Rrustemaj: Infermierët po braktisin Kosovën

2019-05-06 në ora 09:46

Infermierët kosovarë janë diskriminuar me Ligjin e pagave. Kjo vetëm do të rrisë trendin e largimit të tyre nga Kosova.

Oda e Infermierëve ka kërkuar nga Presidenti, Qeveria dhe Parlamenti që të mos e çojnë përpara Ligjin për Pagat. Por, kryetari i Odës së Infermierëve Naser Rrustemaj, në emisionin “Aktual”, në RTK 3, ka thënë se nuk kanë marrë fare përgjigje për këtë derisa kjo do të bëj që infermierët të largohen nga Kosova.

“Sa i përket ligjit të pagave, janë diskriminuar shumë. Janë futur të gjithë në një kategori. Ne si Odë e Infermierëve kemi dërgua shkresë edhe Presidentit, Kryeparlamentarit dhe Kryeministrit që këtë ligj të mos e çojnë përpara.

Kjo do ta vështirësojë edhe më shumë gjendjen e infermierëve që po largohen edhe ashtu nga Kosova”, ka thënë Rrustemaj.

Problemi më i madh është përgatitja profesionale e infermierëve për t’i bërë ata të gatshëm për punë. “Dhe, vetëm në Infektivë në repartin e Intenzivës brenda javës kanë lëshua punën 3 infermierë”, ka shtuar ai, duke treguar se ka shume vështirësi në zëvendësimin e këtyre kuadrove, pasi për fusha specifike nuk mjafton vetëm mbarimi i fakultetit por edhe trajnimi specifik dhe edukimi i vazhdueshëm.

Rrustemaj ka folur edhe për konferencën qe ka organizuar OIK me moton: “Nderojmë të kaluarën, ndërtojmë të ardhmen”.

“Me të vërtetë gjithë konferenca por edhe ngjarja që u zhvillu ka qenë emocionuese. Kemi kujtua trimërinë e kolegëve tanë. Vetëm me shkuar me pa atë vend ishte e vështirë e lëre më me ofrua shërbime aty”, ka thënë Rrustemaj në emisionin Aktual në RTK.

Ai ka kujtuar një rast të veçantë kur nga një shpellë në zonën e Nerodimës ishin strehuar e më vonë ishte urdhëruar të tërhiqen 104 të plagosur dhe është dashur për tërheqjen e secilit të plagosur që të sigurohen 8 persona.

“Është tregu një trimëri shumë e madhe që flet shumë pasi infermierët kanë dhanë gjithçka nga vetja për të ndihmuar jo vetëm ushtarët e UÇK-së por edhe gratë që kanë lindur nëpër male”, ka thënë Rrustemaj. /RTK