Senati i Francës ka refuzuar të mërkurën projektligjin për rregullimin e vdekjes së asistuar, duke e kthyer atë për rishqyrtim në Asamblenë Kombëtare, e cila mund ta miratojë sërish edhe pa pëlqimin e Senatit.
Projektligji synon t’u lejojë të rriturve me sëmundje të pashërueshme dhe në fazë të avancuar ose terminale që të marrin medikamente vdekjeprurëse.
Ndihma nga mjeku ose infermieri do të lejohej vetëm në rastet kur pacienti nuk është fizikisht në gjendje ta kryejë vetë procedurën, shkruan Euronews transmeton Gazeta Shneta.
Për të përfituar nga kjo e drejtë, pacientët duhet të jenë mbi 18 vjeç dhe shtetas francezë ose banorë të Francës.
Sipas tekstit të propozuar, një ekip mjekësor do të duhej të konfirmonte se pacienti vuan nga një sëmundje e rëndë dhe e pashërueshme, shoqëruar me dhimbje të padurueshme dhe të patrajtueshme, si dhe se kërkesa për vdekje të asistuar bëhet në mënyrë të lirë dhe të vetëdijshme.
Personat me çrregullime të rënda psikiatrike ose sëmundje neurodegjenerative, si Alzheimeri, përjashtohen nga kjo procedurë.
Ligji parashikon gjithashtu një klauzolë ndërgjegjeje për profesionistët shëndetësorë që nuk dëshirojnë të marrin pjesë në këtë proces, duke i obliguar ata të drejtojnë pacientin te profesionistë të tjerë.
Projektligji ishte miratuar nga Asambleja Kombëtare në maj të vitit 2025, por u bllokua në Senat me 181 vota kundër dhe 122 pro. Kritikat ndaj tij vijnë si nga politikanë të djathtë që e kundërshtojnë vdekjen e asistuar në parim, ashtu edhe nga mbështetës që e konsiderojnë tekstin përfundimtar shumë të zbutur.
Në të njëjtën seancë, Senati miratoi pothuajse unanimisht një ligj të veçantë për kujdesin paliativ, me synim zgjerimin e qasjes në përkujdesjen ndaj pacientëve në fund të jetës.
Procesi legjislativ pritet të vazhdojë në javën e 16 shkurtit, me leximin e dytë të projektligjit në Asamblenë Kombëtare. Nëse miratohet sërish, ligji do të kthehet në Senat për një lexim të dytë, megjithëse fjala e fundit i takon Asamblesë.