Mungesa e një anestetiku ka shkaktuar anulimin e operacioneve elektive në Spitalin e Gjilanit. Në Ministrinë e Shëndetësisë thonë se kontrata e rregullt është vonuar për shkak të ankesave, ndërsa pritet të bëhet furnizimi emergjent. Edhe fillimi i vitit 2018 kishte sjellë anulimin e operacioneve në QKUK për shkak të mungesës së barnave
Qendra Klinike Universitare e Kosovës dhe Spitalet e Përgjithshme kanë mbetur pa anestetikun “Sevofluran”. QKUK dhe spitalet aktualisht po furnizohen nga sasia që ka mbetur në Spitalin e Prizrenit. Mungesa e këtij bari ka shkaktuar edhe anulimin e operacioneve elektive në Spitalin e Gjilanit, shkruan Gazeta Shneta.
Drejtori i këtij spitali, Dr. Nisret Hajrullahu, ka deklaruar se janë detyruar të anulojnë disa operacione për shkak të mungesës së anestetikut. “Për rastet elektive kemi pas çrregullime dhe kemi zvogëluar programin. Nuk i kemi heq krejt por për shkak të mungesës së anestetikut, kemi punuar vetëm rastet urgjente. Nuk ka pësuar asnjë pacient, por është dashur të zvogëlohet vëllimi i punës. Do të furnizohemi nga Spitali i Prizrenit dhe do të normalizohet puna”, ka thënë Hajrullahu.
Mungesën e këtij anestetiku e kanë konfirmuar edhe zyrtarët e QKUK-së. Në një përgjigje për Gazetën Shneta, thuhet se “Sevoflurani” është huazuar nga spitalet e përgjithshme.
“Zyra për informim e QKUK-së, ju njofton se është huazuar nga Spitalet e Përgjithshme sasi e sevofluranit. Ndërkaq, jemi në koordinim të vazhdueshëm me Ministrinë e Shëndetësisë, përkatësisht me Fondin e Sigurimeve Shëndetësore dhe pritet bëhet furnizimi shpejtë”, thuhet në përgjigje.
Në anën tjetër, zyrtarët e Ministrisë së Shëndetësisë thonë se produkti “Sevofluran” është në procedurë të shqyrtimit, për shkak të ankesës së operatorit ekonomik. Ata thonë se janë në pritje të vendimit të OSHP-së rreth ankesës së ushtruar.
“Por, derisa të përfundohen të gjitha procedurat me kontratën e rregullt dhe OSHP të marrë një vendim, Ministria e Shëndetësisë ka nisur procedurat për kontratë për furnizim prioritar në mënyrë që pacientët të cilët kanë nevojë për këtë bari të mos kenë nevojë ta blejnë nga xhepi i tyre. Msh është në proces të nënshkrimit të kontratës me prioritet (për furnizim emergjent) , dhe porsa të nënshkruhet, do të nis menjëherë furnizimi me këtë produkt”, thuhet në përgjigjen e MSH-së.
Kujtojmë se edhe fillimviti i kaluar ka qenë mjaft i vështirë me furnizimin e barnave. Disa klinika të QKUK-së patën anuluar programin për disa ditë në mungesë të barnave dhe materialeve. /Gazeta Shneta/