Rastet e mbidozimit me vitaminë A te fëmijët janë rritur ndjeshëm gjatë vitit 2025 në Shtetet e Bashkuara, duke ngritur shqetësime te ekspertët e shëndetit publik. Sipas të dhënave të Qendrës së Helmimit nga janari deri në mars u regjistruan 86 raste të ekspozimit të tepërt ndaj vitaminës A, një rritje prej 38.7% krahasuar me të njëjtën periudhë të vitit të kaluar.
Studiuesit besojnë se kjo rritje lidhet me përhapjen e dezinformatave gjatë shpërthimit të fruthit në vitin 2025, kur u raportuan mbi 2,200 raste në 45 juridiksione amerikane. Në rrjete sociale, podkaste dhe media të ndryshme u përhapën pretendime se vitamina A ose vaji i mëlçisë së merlucit mund të parandalonin ose trajtonin fruthin, shkruan burimi Medical News Today transmeton Gazeta Shneta.
Megjithatë, ekspertët theksojnë se këto pretendime janë të pasakta. Vitamina A nuk e parandalon infektimin me virusin e fruthit dhe nuk e shëron sëmundjen. Ajo mund të ndihmojë vetëm në raste të veçanta, kur një fëmijë me fruth ka mungesë të konfirmuar të vitaminës A, duke ulur rrezikun e komplikimeve të rënda.
Mjekët paralajmërojnë se marrja e tepërt e vitaminës A mund të jetë e rrezikshme, pasi ajo grumbullohet në organizëm. Ndryshe nga vitaminat që treten në ujë, vitamina A është e tretshme në yndyrë dhe nivelet e larta mund të shkaktojnë efekte të dëmshme për shëndetin.
Shenjat e mungesës së vitaminës A përfshijnë verbërinë e natës, tharjen e syve dhe rritjen e rrezikut për infeksione. Megjithatë, shumica e njerëzve që ushqehen në mënyrë të balancuar marrin sasi të mjaftueshme të saj nga ushqimet si frutat, perimet, drithërat dhe peshku.
Ekspertët këshillojnë që suplementet me vitaminë A të merren vetëm me rekomandim mjekësor dhe pas analizave përkatëse, pasi vetë-mjekimi me doza të larta mund të sjellë më shumë rrezik sesa përfitim. /Gazeta Shneta/