Në QKUK sot ka ndërruar jetë një paciente nga Komuna e Dragashit.
Klinika Infektive në raportin ditor të punës njofton se pacientja e datëlindjes 1957 ka ndërruar jetë gjatë trajtimit në intensivë, pasi paraprakisht vuante edhe nga sëmundja e veshkave dhe sëmundje të tjera shoqëruese.
Ajo më parë ishte në dializë. Në intensivë për momentin është edhe një rast tjetër i cili po trajtohet dhe i cili ka probleme me veshkë.
Njoftimi i plotë:
“Klinika Infektive e Qendrës Klinike Universitare të Kosovës, në raportin ditor të datës 7 maj 2020, njofton se në klinikë janë të shtrirë 12 raste me Covid-19 pozitiv.
Gjendja e pacientëve të sëmurë me Covid 19 është si vijon:
9 raste janë në gjendje stabile, 2 raste janë në trajtim me oksigjenoterapi dhe përkujdesje intensive.
Në mjekimin intensiv vazhdon të jetë në gjendje të rëndë dhe përkujdesje intensive një pacient i infektuar me Covid -19, i cili ka sëmundje kronike të veshkëve dhe është në dializë.
Në orët e mëngjesit ka ndërruar jetë pacientja e lindur me 1957 nga komuna e Dragashit, e cila veç infeksionit me Covid-19, ka pasur edhe sëmundje kronike të veshkave dhe sëmundje tjera shoqëruese.
Nga klinika sot do të lirohen 5 pacientë të shëruar nga infeksioni me Covid -19, ndërsa 2 raste të cilët kanë rezultuar negativ ne testimet e fundit per Covid 19 vazhdojnë trajtimin në klinikë.”