Shoqata e Obstetërve dhe Gjinekologëve të Kosovës do të organizojë një konferencë ndërkombëtare për Frytnim të Asistuar Mjekësor në bashkëpunim me një spital privat.
Kjo konferencë shënon 20 vjetorin e lindjes së fëmijës së parë në Kosovë përmes procedurës së Frytnimit të Asistuar Mjekësor. Ligji për shëndetin riprodhues në vendin tonë është miratuar në vitin 2008, ndërsa Udhëzimi Administrativ për Frytnim të Asistuar Mjekësor në vitin 2013.
Ky UA e ndalon reklamimin e IVF-së në çfarëdo forme.
Megjithatë në këtë konferencë sipas Shoqatës së Gjinekologëve do të ligjërojnë ekspertë vendor dhe ndërkombëtarë në këtë fushë.
Njoftimi i plotë:
Të nderuar kolegë,
Kemi kënaqësinë t’ju ftojmë në konferencën për të shënuar 20-vjetorin e foshnjës së parë të fekondimit In-Vitro (IVF) të lindur në Kosovë.
Konferenca do të mbahet më 3 qershor 2023 në Hotel Emerald në Prishtinë dhe do të paraqesë një koleksion prezantimesh nga ekspertë të respektuar në këtë fushë.
Kjo konferencë ofron një mundësi të mirë për t’u informuar me përparimet shkencore që janë bërë në teknologjitë riprodhuese gjatë viteve të fundit.
Do të dëgjoni prezentime nga profesionistë të njohur të shëndetit riprodhues, si dhe do të keni mundësinë të ndërveproni me ta.
Qëllimi ynë është t’iu paraqesim të pranishmëve një pasqyrë të procesit të IVF, duke theksuar historikun, rrjedhën dhe praktikat aktuale tek ne dhe në botë.
Me sesione interaktive dhe leksione informative, të pranishmit mund të mësojnë për mundësitë dhe kufizimet e IVF, si dhe të diskutojnë shqetësimet e mundshme etike.
Mezi presim t’ju mirëpresim në këtë ngjarje, ku mund të zgjeroni njohuritë tuaja për IVF.
Me nderime,
Naser Rafuna
Kryetar i ShGjOK