SHSKUK ka mbuluar financiarisht qëndrimin një mujor në Tiranë të dy anesteziologeve të QKUK-së. Kjo gjë u bë në emër të financimit për udhëtime zyrtare, ndërsa për dikë është e çuditshme sepse ndodhë për herë të parë
Shërbimi Spitalor Klinik Universitar i Kosovës nuk e ka të rregulluar me ligj apo rregullore të brendshme, financimin e personelit mjekësor për trajnime jashtë vendit.
Por për dy anesteziologe është gjetur një mënyrë për t’ua mbuluar shpenzimet e banimit në Tiranë, për një trajnim një mujor, shkruan Gazeta Shneta.
Në emër të Rregullores për udhëtime zyrtare dhe pjesëmarrje në komisione, SHSKUK pagoi 1 mijë euro për akomodimin e Doruntina Bunjaku dhe Dafina Matoshi në kryeqytetin shqiptar.
Kjo është konfirmuar edhe nga Zyra e Drejtorit të Përgjithshëm të SHSKUK-së, Dr. Basri Sejdiu.
“Zyra e drejtorit të përgjithshëm SHSKUK, ju konfirmon se bazuar në Rregulloren për udhëtime zyrtare dhe pjesëmarrje në komisione, për shkak të nevojës së madhe që ka pasur shërbimi i kardiokirurgjisë për anesteziolog/e, është lejuar 1 muaj trajnim për dy anesteziologe në QSUT Tiranë, tek shërbimi i kardiokirurgjisë, meqë ka pasur nevojë për funksionalizim 24- orë të këtij shërbimi në QKUK”, thuhet në përgjigjen e Zyrës së SHSKUK-së.
“Dy doktoreshat kanë marrë në total 1 mijë euro. Pra nga 500 secila për 1 muaj, vetëm për banim- akomodim”, ka konfirmuar kjo zyrë për Gazeta Shneta. Tutje theksohet se mjeket tashmë kanë filluar punën në shërbimin e kardiokirurgjisë.
Se ka pasur nevojë për shtimin e numrit të anesteziologëve, e pranon edhe drejtori i Klinikës së Anestezionit, Dr. Nehat Baftiu. Por ai çuditet se si SHSKUK ua pagoi qëndrimin në Tiranë.
“Ka pasur nevojë dhe ka nevojë edhe më tutje për ta shtuar numrin e anesteziologëve, por financimi nga SHSKUK ndodhë për herë të parë”, deklaron Baftiu.
Anesteziologu thotë se vet ka udhëtuar në disa shtete për trajnime, por gjithmonë ka udhëtuar me vetfinancim. Madje shton se edhe kolegë të tij së fundmi kanë udhëtuar për në Turqi pa i ndihmuar as SHSKUK dhe as Ministria e Shëndetësisë.
Baftiu ka shtuar se ka edhe shumë të tjerë që duan të shkojnë jashtë vendit për trajnime, por nuk munden për shkak të mungesës së financimit. /Gazeta Shneta/