Klinika e Onkologjisë në QKUK do të furnizohet me aksceleratorin e tretë për rrezatimin e pacientëve me sëmundje malinje.
Shërbimi Spitalor Klinik dhe Universitar i Kosovës ka hapur tenderin për furnizim dhe instalim të Aksceleratorit Linear në vlerë 2.7 milionë Euro, shkruan Gazeta Shneta.
Në njoftimin për kontratë SHSKUK ka kërkuar që kjo pajisje të instalohet brenda këtij viti duke iu referuar nevojës për këtë aparaturë. Kësisojë është kërkuar gjithashtu që procedura e prokurimit të shkurtohet.
“Referuar nevojës që furnizimi dhe instalimi i Aksceleartorit Linear të bëhet gjatë këtij viti, pra gjatë vitit 2024 dhe nisur nga fakti që për furnizimin dhe instalimin e Aksceleratorit Linear nevojitet që paraprakisht të punohen të gjitha punët ndërtimore për ndërtimin e Bunkerit dhe hapësirave punuese të personelit shëndetësore shtrohet kërkesa dhe nevoja që të shkohet me procedura të shkurtuara të prokurimit në mënyrë që në tersi të realizohen punët ndërtimore dhe të bëhet furnizimi dhe instalimi i Aksceleratorit Linear gjatë vitit 2024”, thuhet në Njoftimin për Kontratë.
Njoftimi është publikuar më datën 21 qershor, ndërsa afati i fundit për dorëzimin e aplikacioneve për operatorët ekonomik është vendosur data 15 korrik 2024. Sipas Ligjit të Prokurimit Publik, për kontratat me vlerë të madhe mbi 125 mijë Euro, afati kohor duhet të jetë së paku 40 ditë.
Ndryshe ky është aksceleratori i tretë që SHSKUK e blen brenda tre viteve. I pari kishte kushtuar 1.5 milionë Euro dhe është vënë në funksion në vitin 2021, kurse i dyti ka kushtuar 1.4 milionë Euro dhe është inauguruar vitin e kaluar. /Gazeta Shneta/