Shërbimi Spitalor Klinik Universitar i Kosovës ka prezantuar sot projektin për trajtimin e infarktit akut brenda 2 orësh me pacientë nga e gjithë Kosova. Projekti pritet të filloj në Prishtinë, e më pastaj për t’u shpërndarë edhe në komunat tjera
Drejtori i SHSKUK-së, Dr. Basri Sejdiu, e ka konsideruar si ditë të madhe për shëndetësinë lansimin e këtij projekti. Ai ka deklaruar se me këtë projekt Kosova do t’i kalojë vendet e regjionit në shëndetësi, ndërsa do të barazohet me vendet evropiane, shkruan Gazeta Shneta.
“Brenda 120 minutave shpëtohet muskuli i zemrës së pacientit dhe shpëtohet nga invaliditeti. Lufta më e madhe në botë bëhet që pacienti të arrij tek mjeku brenda 2 orëve të para. Tani me dy salla të kateterizimit dhe me mjek të trajnuar, ka ardhur koha që trajtimi i infarktit do të mund të bëhet brenda 2 orëve të para”, ka thënë Sejdiu.
Sejdiu ka folur tutje për historinë e kardiologjisë invazive në Kosovë duke thënë se kjo fushë e mjekësië ka ardhur fal bashkëpunimit të QKUK-së me qendrën spitalore në Tuzël. Ai tha se ekipa që ishte trajnuar atje nuk kishte arritur ta realizonte kardiologjinë invazive në QKUK për shkaqe objektive, ndërsa tutje ka përmendur se koronarografia e parë është realizuar më 31 tetor të vitit 2003, ndërsa stentimi i parë më 5 mars 2005 nga kjo ekipë.
“Ekipa e përbërë nga unë, Dr. Tefik Bekteshi dhe të tjerë filluam pas shumë sfidave stentimin në viti 2008 në QKUK”, ka shtuar tutje Sejdiu.
Në anën tjetër Ministri i Shëndetësisë, Uran Ismaili, ka thënë se ky projekt vjen në kohën e trendit të rritjes së sëmundjeve kardiovaskulare.
“Ky projekt mundëson trajtimin brenda 2 orëve që nga simptomat e para. Kjo kohë llogaritet si kohë e artë për shpëtimin e pacientit. Ky fakt bën që të kuptojmë që disa hallka të shëndetësisë po forcohen. QKUK nëpërmjet pajisjeve të reja, organizimit më të mirë dhe funksionimit 24h ka arritur të mbaj barrën e pacientëve brenda institucioneve publike. Tani po kalojmë në forcimin e mjekësisë primare dhe pacienti të mos humbet në mes këtyre dy hallkave dhe që të përfundoj me fatalitet”, ka thënë ministri.
Ismaili ka kërkuar që ky projekt të trajtohet me seriozitet dhe të mos zvarritet në realizimin e tij.
Ndërkaq drejtori i Klinikës së Kardiokirurgjisë me Kardiologji Invazive, Dr. Tefik Bekteshi, ka prezantuar më gjerësisht kronologjinë e trajtimit të infarktit në Kosovë, si dhe metodat e përdorura. Ai ka thënë se në të ardhmen do të ketë nevojë për tri deri katër salla të kateterizimit, rreth 50 kardiologë dhe rreth 30 kardiologë intervent.
“Ky projekt është një proces i cili do të zgjatë me vite dhe shpresoj që të arrijmë në shërbime shëndetësore të nivelit evropian. Pozita në shoqëri dhe paratë nuk i bëjnë punë askujt në rastin e infarktit akut”, ka deklaruar Bekteshi. /Gazeta Shneta/