“Faleminderit prej krejtve që na kanë ndihmu”, kishte thënë me lot në sy shtatëvjeçarja Delfina Shala në aeroportin e Prishtinës kur po nisej për në Turqi për t’u shëruar. Ajo vuante nga një sëmundje në boshtin kurrizor dhe prindërit e saj ishin gëzuar që kishin arritur t’i mblidhnin 16 mijë euro për trajtim.
Por Delfina nuk do të kthehet e gjallë në Kosovë. Ajo ka ndërruar jetë në një spital në Turqi ku u operua për riparimin e ‘spina bifida’ dhe nervat e këmbëve. Rastin e vdekjes së saj e kanë konfirmuar familjarët të cilët kanë bërë të ditur se ajo ka ndërruar jetë në mëngjesin e së mërkurës.
Prindërit e saj kanë dyshime për trajtimin që stafi spitalor ka bërë ndaj vajzës së tyre dhe insistojnë që shtatëvjeçares t’i bëhet autopsia. Vogëlushja vuante nga një sëmundje në boshtin kurrizor, e për shërimin e saj u deshën 16 mijë euro të cilat u grumbulluan pas një raportimi të Klan Kosovës .
Klan Kosova realizoi kronikë edhe për momentin e nisjes së Delfina Shalës për trajtim në Turqi.