Qendra Klinike Universitare e Kosovës ka njoftuar sot se në Kirurgjinë Vaskulare është kryer një operacion i rrallë për herë të parë.
Për herë të parë? Në fakt nuk po del të jetë ashtu.
Është fjala për Sindromën Eagle, një patologji e rrallë që ndodh kur bëhet zgjatja jonormale e procesit stiloid (një pjesëz e kafkës) në bazën e kafkës dhe shkakton dhimbje, therje dhe ndjesi e trupit të huaj në fyt, shkruan Gazeta Shneta.
Sipas njoftimit të QKUK-së, operacioni për heqjen e kësaj pjesëze është kryer sot sefte në këtë institucion nga kirurgët vaskular.
“Pas ekzaminimeve të nevojshme biokimike, radiologjike dhe të tjera, u konstatua një zgjatje e procesit stiloid me gjatësi rreth 5.5 cm, gjë që e bënte të domosdoshëm trajtimin kirurgjikal. Duke marrë parasysh përfshirjen e strukturave vaskulare të qafës, u vendos që ndërhyrja të realizohej në Klinikën e Kirurgjisë Vaskulare, përmes qasjes ekstraorale, e cila mundëson ekspozim optimal anatomik dhe kontroll të plotë të strukturave vitale vaskulare dhe nervore”, thuhet në njoftimin e QKUK-së
Por ky lajm nuk po del të jetë krejt i saktë. Gazeta Shneta ka biseduar edhe me kirurgët maksillofacial dhe të njëjtit kanë deklaruar se këtë operacion e kryejnë tash e 20 vite.
“Sindroma Eagle trajtohet nga specialistët e klinikës tonë që 20 vite. E kanë kryer atëherë dhe e kryejmë edhe tash. Për këtë kemi evidenca, incizime dhe protokolle”, ka thënë njëri nga kirurgët.
Sidoqoftë, lajmi i mirë është se kjo patologji e rrallë ka zgjidhje në Qendrën Klinike Universitare të Kosovës. /Gazeta Shneta/