Kryetari i Komunës së Klinës, Zenun Elezaj, ka bërë të ditur se disa fshatra të kësaj komune po përballen me zjarre të fuqishme, të cilat kanë shkaktuar dëme të konsiderueshme materiale.
Ai ka thënë se bashkë me drejtorin e DSHPE-së, Qendrim Millakun, ndodhen në terren dhe janë në koordinim të plotë me ekipet e zjarrfikësve, që po punojnë pa ndërprerje për të lokalizuar dhe vënë nën kontroll vatrat e zjarrit.
“Një falënderim shkon për ekipet e zjarrfikësve të Klinës dhe atyre nga Peja, Rahoveci dhe Gjakova, të cilët kanë ardhur menjëherë në ndihmë dhe po japin kontribut të çmuar në këtë situatë emergjente”, ka theksuar Elezaj.
Ai u ka bërë thirrje qytetarëve të tregojnë kujdes maksimal dhe të mos ndezin hamullore apo mbeturina, pasi rreziku për përhapjen e zjarreve është shumë i madh dhe mund të shkaktojë pasoja serioze për jetën dhe pronën e banorëve.
Sipas tij, Komuna e Klinës do të vazhdojë të jetë e angazhuar me të gjitha kapacitetet për të menaxhuar situatën dhe për të mbrojtur sigurinë e qytetarëve.