Spanja ka raportuar 1,060 vdekje të lidhura me temperaturat e larta gjatë muajit korrik, një rritje e ndjeshme krahasuar me të njëjtën periudhë të një viti më parë. Ky muaj shënoi një nga periudhat më të rënda për shëndetin publik për shkak të valëve të të nxehtit, sipas Sistemit të Monitorimit të Vdekshmërisë Ditore (MoMo).
Në javën e parë të gushtit, vala e re e të nxehtit tashmë ka marrë viktimën e saj të parë: një burrë 85-vjeçar që humbi jetën të hënën në Badajoz nga goditja termike, raporton Euronews Health transmeton Gazeta Shneta.
Temperatura në disa zona si Badajoz dhe Jaén pritet të arrijë deri në 42°C, ndërsa në Madrid deri në 38°C. Në krahasim, qytete bregdetare si Barcelona, Malaga dhe Valencia do të përjetojnë temperatura më të buta, mes 30°C dhe 33°C.
Shifra totale e vdekjeve të lidhura me nxehtësinë për vitin 2025 deri tani ka arritur në 3,255 – shumë më e lartë se numri total prej 2,534 i vitit të kaluar – dhe vera ende nuk ka përfunduar.
Agjencia Shtetërore Meteorologjike e Spanjës (Aemet) parashikon që vala e të nxehtit do të zgjasë të paktën deri të dielën. /Gazeta Shneta/