Specializantët nga Shqipëria, Maqedonia e Veriut, Mali i Zi dhe Lugina e Preshevës kanë kërkuar nga Ministria e Shëndetësisë (MSh) që pagesa vjetore e specializimit të jetë e njëjtë me atë të specializantëve nga Kosova.
Një grup specializantësh nga vendet e rajonit i ka dërguar një kërkesë redaksisë së Gazetës Shneta, duke ngritur si çështje trajtimin e pabarabartë në pagesat e specializimit.
Sipas tyre, aktualisht ata përballen me një detyrim financiar prej 5000 euro në total, përkatësisht 1000 euro në vit, ndërsa specializantët nga Kosova paguajnë 500 euro në vit. Ata e konsiderojnë këtë dallim si barrë të rëndë financiare dhe trajtim të pabarabartë për të njëjtin angazhim profesional.
Ky grup thekson se gjatë gjithë periudhës së specializimit kanë përmbushur obligimet dhe kanë kontribuar në shërbimet shëndetësore në të njëjtin nivel si të gjithë specializantët e tjerë.
Ata shtojnë se kanë marrë premtime të vazhdueshme nga institucionet përkatëse për zgjidhjen e çështjes, por deri më tani nuk është marrë asnjë vendim konkret.
Sipas tyre, kërkesat janë dorëzuar edhe zyrtarisht pranë institucioneve përgjegjëse. Ata kërkojnë që çështja të trajtohet me prioritet dhe të merret një vendim që siguron trajtim të barabartë për të gjithë specializantët.
“Një sistem shëndetësor i drejtë ndërtohet mbi parime të barazisë, respektit dhe vlerësimit të kontributit të çdo profesionisti që është pjesë e tij”, thuhet në përmbylljen e kërkesës së tyre. /Gazeta Shneta/