Rrezikun që institucionet shëndetësore publike, veçanërisht Spitalet Rajonale dhe QKUK, të mbesin pa staf të fushës së Teknologjisë së Informacionit (IT) ekziston akoma. Shkak kryesor për këtë situatë mbeten pagat e ulëta dhe koeficienti i pamjaftueshëm i përcaktuar me Ligjin e Pagave.
Sipas burimeve të IndeksOnline, në spitalet e Gjakovës, Pejës dhe Mitrovicës, disa punonjës të IT-së tashmë janë larguar nga puna, ndërsa situata pritet të përkeqësohet edhe në dy spitale të tjera rajonale dhe në QKUK, ku punonjësit e IT-së po shqyrtojnë dorëheqjen e tyre.
Këto profile janë të trajnuara dhe me përvojë në sistemin shëndetësor, duke pasur njohuri specifike për menaxhimin dhe mirëmbajtjen e sistemeve kritike të shërbimeve mjekësore. Me largimin e tyre, spitalet rrezikojnë të humbasin ekspertizën e akumuluar ndër vite, duke krijuar boshllëqe të mëdha në menaxhimin e infrastrukturës teknologjike.
Me rritjen e kërkesës për profesionistë të IT-së në tregun privat dhe pagat më konkurruese në këtë sektor, sektori publik duket se po humb interesin për specialistët e kësaj fushe.
Kjo ndikon drejtpërdrejt në procesin e digjitalizimit të shërbimeve shëndetësore, përfshirë edhe funksionalizimin e Sistemit Informativ Shëndetësor (SISh), i cili është jetik për menaxhimin dhe ofrimin e shërbimeve cilësore për pacientët.