Spitali i Pejës e ka blerë rezonancën magnetike më shumë se 58 mijë euro më shtrenjtë sesa vlera e parashikuar. Eksperti shqyrtues në OSHP ka rekomanduar anulimin e procedurës dhe ritenderimin, por paneli shqyrtues nuk e ka marr parasyshë dhe i dhënë leje Spitalit që të vazhdojë procedurën
Spitali i Pejës në qershor të këtij viti e ka shpallur fitues kompaninë “Medbrand SHPK” me pronar Shkëlqim Verdha, për furnizim me rezonancë magnetike në vlerë 558,800 Euro, ndonëse se vlera e parashikuar në njoftimin për kontratë ishte fiks 500 mijë Euro, shkruan Gazeta Shneta.
Kundër këtij vendimi ishte ankuar një operator tjetër, “Uni-Care SHPK” me pronarë Lindita Hasani Neziri, Nora Jupolli Krasniqi, Yll Bajrami, Ismajl Shurdhaj, të cilët kishin ofertuar me vlerë 482,022 Euro. Por OSHP e ka refuzuar ankesën, ndonëse eksperti shqyrtues kishte rekomanduar që procedura të anulohej pasi ishte në kundërshtim me Ligjin e Prokurimit Publik.
“Duke u bazuar në faktet, sqarimet e lartpërmendura dhe të gjeturat tjera në këtë raport, eksperti shqyrtues i propozon panelit shqyrtues që ankesa e grupit të OE: ‘Uni-Care’ SHPK-Prishtinë, aprovohet si e bazuar, dhe rekomandon të anulohet B58-njoftimi mbi vendimin e AK (vendimi për dhënie të kontratës) dhe lënda të Anulohet – anulimin e aktivitetit të prokurimit sipas nenit 62 të LPP-së, dhe nëse akoma ka interes AK mund ta ri-tenderoj dhe të veproj në përputhje të plotë me dispozitat ligjore të LPP-së”, citohet eksperti shqyrtues në dokumentin e vendimit të OSHP-së.
Por paneli shqyrtues i përbërë nga Vedat Poterqoi – kryetar dhe anëtaret Nita Bejta-referuese dhe Vjosa Gradinaj Mexhuani, kanë vendosur ndryshe nga mendimi i ekspertit shqyrtues.
“Refuzohet si e pabazuar ankesa e operatorit ekonomik ‘Uni-Care’ SHPK-Prishtinë kundër njoftimit mbi dhënien e kontratës, lidhur me aktivitetin e prokurimit me titull: Furnizim me Rezonancë Magnetike…iniciuar nga Spitali i Përgjithshëm i Pejës”, thuhet në vendimin e panelit shqyrtues.
Ky panel i ka kërkuar Spitalit të Pejës që para se të nënshkruaj kontratën të sigurojë mjetet shtesë për përfundimin e aktivitetit. E këto mjete shtesë do të sigurohen përmes buxhetit për investime kapitale të SHSKUK-së.
Kjo është bërë e ditur përmes një vendimi të ish-drejtorit të SHSKUK-së Valbon Krasniqi dhe ZKF-së së SHSKUK-së Sherif Bytyqi, i bashkëngjitur në vendimin e OSHP-së.
“Në bazë të kërkesës së juaj të datës 01.07.2022, ju konfirmojm se pjesa e mjeteve shtesë prej 58,800 Euro për furnizimin e MRI-së do të mbulohet nga Investimet Kapitale i programit 11320-Administrata Qendrore e SHSKUK nga projekti nr. 18235 ‘Blerja e pajisjeve mjekësore për njësitë përbërëse të SHSKUK’”, thuhet në këtë dokument të nënshkruar nga Krasniqi dhe Bytyqi.
Megjithatë eksperti shqyrtues ka vlerësuar se autoriteti kontraktues, në këtë rast Spitali i Pejës, ka vepruar në kundërshtim me nenin 9 dhe 62 të Ligjit të Prokurimit Publik, duke kufizuar konkurrencën sepse operatorët ekonomik nuk kanë pasur njohuri se vlera e parashikuar do të rritej.
“Sikur ta dinte se do të rritej vlera e parashikuar apo sikur të ishte më e lartë vlera e parashikuar e kontratës për këtë AP, sigurisht se do të tenderonte me njërin nga llojet e specifikuar…dhe sigurisht se do të tenderonin edhe OE të tjerë në këtë aktivitet të prokurimit, që do të thotë se njësia e kërkesës e njeh shumë mirë këtë pajisje dhe ka planifikuar vlerën e parashikuar, posht çmimit të tregut, apo/ose ka rritur specifikimet teknike mbi vlerën e parashikuar që do të thotë se AK nuk ka vepruar në pajtim të plotë me nenin 9 të LPP-së dhe ka vepruar në kundërshtim me nenin 62 të LPP-së”, thuhet në vlerësimin e ekspertit shqyrtues.
Vendimin e plotë të OSHP-së dhe pretendimet e palëve i gjeni duke klikuar në këtë vegzë 218-22 vendim /Gazeta Shneta/