Spitali i Përgjithshëm i Gjilanit ka njoftuar se është pajisur me aparaturën e avancuar mjekësore Digital C-ARM System, përmes një bashkëpunimi ndërmjet Ministrisë së Shëndetësisë dhe SHSKUK-së.
Sipas njoftimit, kjo pajisje konsiderohet si një teknologji moderne që rrit ndjeshëm cilësinë e shërbimeve diagnostike dhe trajtuese, veçanërisht në lëmin e Ortopedisë dhe Traumatologjisë.
Drejtori i Spitalit, Dr. Afrim Cana, ka theksuar se investime të tilla po përkthehen drejtpërdrejt në përfitime për pacientët.
“Bashkëpunimi ynë i vazhdueshëm me Ministrinë e Shëndetësisë dhe SHSKUK po sjell rezultate konkrete për pacientët dhe stafin tonë. Instalimi dhe vënia në funksion e pajisjes së re DIGITAL C-ARM SYSTEM po mundëson avancimin e shërbimeve diagnostike, rritjen e cilësisë së trajtimit dhe ofrimin e një kujdesi më të shpejtë dhe më të saktë për pacientët tanë,” tha ai.
Tutje, drejtori ka vlerësuar se partneriteti i deritanishëm ka treguar efikasitet dhe vizion zhvillimor:
“Bashkëpunimi ndërmjet SHSKUK-së dhe Spitalit të Përgjithshëm të Gjilanit po dëshmohet si një model i suksesshëm për zhvillimin e kapaciteteve shëndetësore. Përmes koordinimit të përbashkët dhe investimeve të synuara, po krijohen kushte më moderne pune për stafin mjekësor dhe shërbime më cilësore për pacientët e Ortopedisë dhe Traumatologjisë.”
DIGITAL C-ARM System është pajisje fluoroskopike e cila shërben si mjete thelbësore në trajtimet operative, minimal invazive dhe në procedurat e mbyllura kirurgjikale. Në ortopedi njihet edhe si “syri i tretë i kirurgut”, pasi mundëson kontroll të vazhdueshëm radiologjik gjatë ndërhyrjeve.