Shërbimi i Fiziatrisë në Spitalin e Përgjithshëm “Dr. Sami Haxhibeqiri” në Mitrovicë ka shënuar një aktivitet të lartë gjatë vitit 2025, duke realizuar 31 mijë e 834 seanca fizioterapie për 840 pacientë.
Ky shërbim funksionon me një mjeke specialiste të Fiziatrisë dhe një staf prej shtatë fizioterapistësh, të cilët janë të mbështetur me aparaturë moderne dhe hapësira të kompletuara për trajtim dhe rehabilitim.
Sipas njoftimit të spitalit, Shërbimi i Fiziatrisë, i udhëhequr nga Dr. Hyrije Koci, ka ofruar një numër të konsiderueshëm vizitash specialistike dhe seancash të ndryshme fizioterapie, duke iu përgjigjur nevojave të pacientëve nga Mitrovica dhe rajoni.
Nga spitali bëhet e ditur se pacientët që kanë nevojë për shërbime të fizioterapisë duhet fillimisht të paraqiten për konsultë mjekësore, ku pas vlerësimit profesional përcaktohet nëse trajtimi do të përfshijë seanca fizioterapie apo terapi të tjera përcjellëse./Gazeta Shneta/
