Spitali i Përgjithshëm i Prizrenit do të rinovojë repartin e pediatrisë dhe atë të internos.
Për punimet e renovimit të këtyre dy reparteve, ky spital e ka shpërblyer me tender kompaninë e njohur tanimë për renovime në spitale “Termomontimi”, shkruan Gazeta Shneta.
Tenderi me titull “Renovimi dhe riorganizimi i reparteve Pediatri dhe interno Spitali i Përgjithshem”, do t’i kushtojë Spitalit të Prizrenit 2,276,677 Euro.
Kjo kompani ka përfituar një numër goxha të madh të tenderëve për renovime në shëndetësi në së paku dy vitet e fundit.
Aktualisht ka në proces tenderin për Renovimin e Institutit Patologjik-Paraklinik në katin e parë me vlerë 616,300 Euro. Ky tender është dhënë nga QKUK më datën 7 gusht të këtij viti.
“Termomontimi” gjithashtu e ka në proces edhe tenderin për renovimin e depos së barnave të Ministrisë së Shëndetësisë me vlerë 1,770,554 Euro. Oferta e kësaj kompanie ishte më e shtrenjta, rreth 300 mijë euro më e lartë sesa ofertat tjera. /Gazeta Shneta/