Ministria e Shëndetësisë ka dal me një sqarim në lidhje me mjetet e alokuara për ndërtimin e QKMF-së në Gjakovë. Kjo ministri ka deklaruar se 320 mijë euro të ndara për këtë projekt kanë qenë mjete të planifikuara në kuadër të projektit i cili ka filluar në vitin 2017 dhe pritet të përfundojë në 2021, e jo mjete shtesë siç është raportuar në media
Sqarimi i plotë i MSH-së:
Projekti për ndërtimin e QKMF-së në Gjakovë është projekt afatmesëm tre vjeçar (2017-2021) dhe vlera e përgjitshme e kontratës është 802.174.10 €.
Si projekt është i bashkëfinancuar nga Ministria e Shëndetësisë në vlerë prej 571,709.48 € ose 71.27 %. dhe nga Komuna e Gjakovës në vlerë pre 230,464.62 €, ose 28.73 %.
Totali i pagesave të kryera deri më 31 dhjetor 2018 për këtë projekt ka qenë 340. 374 euro.
Duke respektuar të drejtën e mediave për të raportuar për ecurinë e projekteve kapitale të financuara nga buxheti i Kosovës si ky dhe të tjera dëshirojmë të shpjegojmë se 320 000 eurot e alokuara për këtë vit nga Ministria e Shëndetësisë nuk nënkuptojmë mjete shtesë për përmbylljen e projektit të QKMF-së në Gjakovë, por janë mjetë të planifikuara për projektin dhe realizimin e tij gjatë periudhës 3 vjeçare (2017-2021)
Sikur është thënë edhe në përgjigjet e mëhershme nga Ministria, pavarësisht të gjeturave rreth projektit në fazën e auditimit, Ministria e Shëndetësisë do ta monitorojë zbatimin e këtij projekti sipas kontratës së nënshkruar dhe kompania e kontraktuar është e obliguar ta përmbush obligimin që nënkupton të kryejë të gjitha punët sipas kontratës së lidhur dhe pagesave të bëra nga Ministria dhe Komuna.
Asnjë investimit kapital nuk do të pranohet si projekt i mbyllur pa u përmbushur të gjitha obligimet që dalin nga kontrata, ndërkohë që të gjeturat e Auditorit, MSh është duke i adresuar në mënyrën më transparente, me qëllim të shfrytëzimit të drejtë dhe në dobi të taksapaguesve kosovarë të buxhetit të Kosovës.