Një studim i ri nga Universiteti Nagoya në Japoni sugjeron se identifikimi dhe shprehja e emocioneve me fjalë mund të ndihmojë në menaxhimin e ankthit, veçanërisht tek personat me tipare më të theksuara autike.
Hulumtimi, i publikuar në revistën shkencore “Scientific Reports”, ka analizuar lidhjen ndërmjet ankthit, pasigurisë dhe mënyrës se si njerëzit i shprehin emocionet e tyre.
Në studim morën pjesë 505 të rritur japonezë të moshës 20 deri në 39 vjeç. Studiuesit vlerësuan tiparet autike, nivelin e ankthit të lidhur me situatat e paparashikueshme dhe prirjen për t’i verbalizuar emocionet.
Sipas rezultateve, personat me më shumë tipare autike kishin më shumë gjasa të përjetonin ankth në situata të pasigurta, por njëkohësisht kishin tendencë më të madhe për t’i përshkruar emocionet me fjalë.
Studiuesit thonë se emërtimi i emocioneve – qoftë duke i shprehur me zë, me shkrim apo në mënyrë të brendshme – mund t’i bëjë ndjenjat e vështira më të menaxhueshme.
Sipas tyre, kjo mund të ketë rëndësi praktike në shkolla, terapi dhe ambiente familjare, pasi ndihma për një person që të identifikojë emocionet e veta mund të ndikojë pozitivisht në menaxhimin e stresit dhe ankthit.
Megjithatë, autorët theksojnë se rezultatet janë paraprake, pasi pjesëmarrësit nuk kishin diagnozë klinike të çrregullimit të spektrit autik.
Ekipi hulumtues ka bërë të ditur se tashmë po zhvillon studime të tjera me persona të diagnostikuar me autizëm për të parë nëse rezultatet janë të njëjta edhe në këtë grup./Gazeta Shneta/