Po sikur një pilulë e thjeshtë të ndihmonte në shërimin nga COVID-19?
Gjigantët farmaceutikë amerikanë Merck dhe Pfizer kanë shpallur rezultate inkurajuese për barnat orale, ndërsa një bari anti-depresiv gjithashtu ka treguar kahje premtuese në atë që mund të hapë një kapitull të ri në luftën kundër pandemisë, shkruan MedicalxPress përcjell Gazeta Shneta.
Cilat janë këto trajtime?
– Janë pilula që merren nga goja sapo shfaqen simptomat e para të COVID-19, për të shmangur format e rënda të sëmundjes, dhe rrjedhimisht shtrimin në spital.
Kjo formë trajtimi është kërkuar që nga fillimi i krizës globale shëndetësore. Pas disa muaj kërkimesh, Merck dhe Pfizer thonë se e kanë arritur këtë qëllim të pakapshëm.
Në fillim të muajit tetor, kompania Merck tha se po kërkonte autorizim në Shtetet e Bashkuara për pilulën e tyre molnupiravir dhe kompania Pfizer ndoqi shembullin e tyre të premten me barin paxlovid.
Të dy janë barna anti-virale që veprojnë duke reduktuar aftësinë e virusit për t’u riprodhuar, dhe rrjedhimisht duke ngadalësuar sëmundjen.
Ndër të tjera, këto kompani thonë se provat klinike të tyre, treguan një reduktim të fortë të rrezikut të shtrimit në spital.
Ata që morën barin molnupiravir të Merck-ut, panë që rreziku i tyre u zvogëlua me 50 përqind dhe ata që morën barin paxlovid të Pfizer, rreziku i tyre ra me gati 90 përqind të shanseve, megjithëse krahasimet e drejtpërdrejta të këtyre normave të efikasitetit duhet të shmangen për shkak të protokolleve të ndryshme të studimit.
Në anën tjetër, një bari anti-depresiv i cili tashmë është i disponueshëm për publikun, fluvoxamine, ka treguar gjithashtu rezultate inkurajuese në parandalimin e formave serioze të COVID-19, sipas një studimi të botuar në muajin tetor nga studiues brazilianë në revistën The Lancet Global Health.
Pse janë të rëndësishme?
Nëse konfirmohet efikasiteti i këtyre barnave, do të jetë një hap i madh përpara në luftën kundër COVID-19.
Këto trajtime do t’i shtoheshin vaksinave për të forcuar arsenalin terapeutik të botës kundër virusit.
Trajtimet tashmë ekzistojnë, kryesisht në formën e antitrupave sintetikë.
Por këto barna, zakonisht synojnë individët që tashmë kanë forma të rënda të sëmundjes, dhe trajtimet e deritanishme në formë injeksionesh ishin më të vështira për t’u administruar në kushte shtëpie.
Një pilulë mund t’i përshkruhet, më shpejt një pacienti i cili më pas do ta marrë lehtësisht në shtëpi.
Trajtimet me barnat e kompanisë Merck dhe Pfizer, të cilat deri më tani nuk kanë shfaqur ndonjë efekt anësor të theksueshëm, do të kërkonin marrjen e rreth dhjetë dozave për pesë ditë.
“Suksesi i këtyre antiviralëve potencialisht shënon një epokë të re në aftësinë tonë për të parandaluar pasojat e rënda të infeksionit SARS-CoV-2,” tha virologu britanik Stephen Griffin për Science Media Center. /Gazeta Shneta/