Kryetarja e Federatës së Sindikatave të Shëndetësisë Tevide Imeri, ka paralajmëruar se shumë shpejt ata që kanë udhëhequr më herët këtë organizatë, do t’i shohim në ballinat e mediave.
Imeri këtë paralajmërim e ka dhënë si kundërpërgjigje ndaj një takimi të një grupi të përfaqësuesve të FSSHK-së javën e kaluar të cilët po vazhdojnë të kundërshtojnë Imerin në pozitën e kryetares, shkruan Gazeta Shneta.
“Ata që tentojnë t’i manipulojnë kolegët tanë duke u’a keqpërdorur sinqeritetin dhe mungesën e njohurive nga fusha e organizimit sindikal, duke bërë përpjekje për t’i dezorientuar dhe dezinformuar, ju betohem “big bosat “ shumë shpejtë do të jenë në ballina të medieve të shkruara e vizuele, ndërsa atëherë do të binden edhe ata të cilët ju kanë besuar”, ka shkruar Imeri në reagimin e saj.
Reagimi i plotë:
Kolegë dhe anëtarësi e nderuar,
Personalisht fare nuk merrem dhe as nuk u kushtoj rëndësi fjalëve dhe takimeve të rrugëve pasi FSSHK është institucion legjitim i cili tani e tutje do punojë me përkushtimin maksimal për të avancuar të drejtat dhe për t’a kthyer dinjitetin e nëpërkëmbur ndër vite nga politikbërësit dhe klanet e tyre të ashtuquajtura “sindikaliste” .
Ata që tentojnë t’i manipulojnë kolegët tanë duke u’a keqpërdorur sinqeritetin dhe mungesën e njohurive nga fusha e organizimit sindikal, duke bërë përpjekje për t’i dezorientuar dhe dezinformuar, ju betohem “big bosat “ shumë shpejtë do të jenë në ballina të medieve të shkruara e vizuele, ndërsa atëherë do të binden edhe ata të cilët ju kanë besuar.
Ecim bashkë dhe të sigurtë me kërkesa të sinqerta, të arsyeshme dhe lehtë të realizueshme.
Panika i ka kapluar shumë nga ata duke vërejtur bashkimin dhe forcën tonë, prandaj janë të frustruar dhe thërrasin grupe të instrumentalizuara dhe individ të cilët nuk janë në gjendje as t’a lexojnë drejtë atë që u’a kanë shkruar “shefat e tyre”, ndërsa shefat e tyre po ashtu kanë “super shefat e tyre “ që u japin llogari çdo ditë, mirëpo procesi i cili ka për qëllim rregullimin e statusit social, mirëqenies sociale dhe ekonomike dhe kthimit të dinjitetit të profesionistëve shëndetësor dhe komuniteteve tjera mbështetëse nuk ka të ndalur.
Ky është premtim.
Me respekt
Tevide Imeri
Kryetare e FSSHK