Kryetari i komunës së Koçanit në Maqedoninë e Veriut, Lupço Papazov ka dhënë dorëheqje pas tragjedisë që ndodhi atje ku mbetën të vdekur 59 persona pas zjarrit që ndodhi në një diskotekë, shkruan burimi Tetova Sot.
“Kërkoj nga të gjitha institucionet kompetente që të hetojnë përgjegjësinë e të gjithë të përfshirëve! Mosveprimi është gjithashtu përgjegjësi. Duhet të hetohen të gjitha detajet, të gjenden të gjitha mangësitë dhe të gjithë ata që kanë kontribuar në këtë tragjedi duhet të mbajnë përgjegjësi. Unë jam plotësisht në dispozicion të institucioneve. Edhe pse sipas ligjit nuk kisha kompetenca të drejtpërdrejta në këtë rast, jam i gatshëm t’u përgjigjem të gjitha pyetjeve për gjithçka, përfshirë edhe veprimet e mia personale”
“Nuk ka fjalë që mund ta përshkruajnë dhimbjen time! Por, në këto momente, duhet të tregojmë integritet, të manifestojmë përgjegjësi të plotë dhe të demonstrojmë ndryshim në mënyrën e veprimit. Me sjelljen tonë duhet të japim shembull se jemi kundër një sistemi që nuk funksionon. Nëse ekziston ndonjë bazë për përgjegjësi ndaj meje, i bëj thirrje prokurorisë që ta hetojë dhe të veprojë në përputhje me ligjet”.
“Për mua, pas kësaj tragjedie, asgjë më nuk ka të njëjtin kuptim! Këta ishin fëmijët tanë! Shumëkush, me të drejtë, ka vënë re pse dje nuk dola në publik gjatë gjithë ditës. Por ata që më njohin e dinë sa i thyer jam dhe si e përjetoj këtë që ka ndodhur. Është e vështirë, dhe do ta përballoj me shumë vështirësi”.
Kam punuar me ndershmëri dhe përkushtim gjatë gjithë jetës sime!
Asnjëherë nuk kam menduar se angazhimi im do të përfundonte në këtë mënyrë, por tani tërhiqem nga kjo detyrë, duke iu lutur Zotit për shpirtrat e fëmijëve tanë, për familjet e tyre dhe për popullin e Maqedonisë!”, ka deklaruar kryetari i Komunës së Koçanit.