Fabrika e barnave “Trepharm” ka sponsorizuar një aktivitet të Klinikës së Kardiologjisë i cili u mbajt dje në QKUK. Në këtë aktivitet morën pjesë edhe ministri i Shëndetësisë Arben Vitia dhe drejtori i SHSKUK-së Elvir Azizi.
Klinika e Kardiologjisë në QKUK dje ka mbajtur një aktivitet ku janë ndarë mirënjohje për disa prej specialistëve dhe specializantëve për punën e tyre gjatë vitit 2023. Në këtë aktivitet morën pjesë edhe ministri i Shëndetësisë Arben Vitia dhe drejtori i SHSKUK-së Elvir Azizi, shkruan Gazeta Shneta.
Pas ndarjes së mirënjohjeve, drejtori i Klinikës së Kardiologjisë Lulzim Kamberi, ka organizuar edhe një koktej rasti. Ky koktej është sponsorizuar nga fabrika e barnave “Trepharm”. Për këtë sponsorizim, kompania e barnave vendosi edhe një reklamë të saj në qendër të aktivitetit në amfiteatrin e Telemjekësisë.
Sponsorizimin e aktivitetit e ka pranuar drejtori Kamberi, por atij nuk i ka ardh mirë se Gazeta është interesuar për këtë çështje. Kamberi ka kërkuar nga redaksia që të raportojmë për sukseset e klinikës, ndonëse Gazeta Shneta ka shkruar disa herë për këtë çështje. Madje vet Kamberi nuk është përgjigjur në një kërkesë të redaksisë për një intervistë mbi sfidat dhe sukseset e kardiologëve në QKUK.
“Prej dhjetera rezultateve impresive disa prej tyre rekorde te klinikes se kardiologjise ju gjetet te interesoheni vetem per kompanine vendore te barnave. Ju informoj se kompania trefarme ka sponzorizuar koktelin ne fund te prezentimit te arritjeve dhe te shpalljes se “Punetoret e Vitit 2023”, ka deklaruar Kamberi.
Ai ka thënë se sponsorizimi është bërë pa ndonjë kushtëzim. “Klinika e Kardiologjise NUK ka buxhet. Certifikatat per punetore viti i kam paguar Une, pavaresisht cmimit. Kokteli pa asnje kushtezim eshte sponzorizuar, per t’i nderuar koleget e pensionuar, themelues te kardiologjisë. Une jam ofruar per sigurim te transportit ne rast te veshtiresive per keta kolege”, ka thënë ai.
Drejtori i Kardiologjisë thotë se sponsorizimi është bazuar në legjislacionin në fuqi, ndonëse nuk ka përmendur asnjë ligj për këtë çështje. “Cdo veprim rreth sponzorimit (pavaresisht te cmimit pothuaj simbolik) eshte bazuar ne legjislacionin aktualisht ne fuqi”, ka thënë ai. /Gazeta Shneta/