Tash e dy javë ultrazëri i Radiologjisë në Qendrën Kryesore të Mjekësisë Familjare në kryeqytet është jashtë funksionit.
Kësisoj, pacientët po detyrohen që këto shërbime t’i marrin në QKUK. Të njëjtit ankohen për këto vështirësi që po u krijohen, sipas tyre krejtësisht të pa arsyeshme.
“Ka shumë pritje, normal që është shumë vështirë është vështirësi e madhe unë jam pensionist 75 vjeçar , me shku atje e jo ktu nuk ja vlenë”, thotë Nexhat Gashi
“Te na ka maru shtëpia e shëndetit, ka maru krejt s’ka kurgju, se këtu është shujt e tash ndash shko në klinikë ndash ku dush njëjtë”, shprehet Azem Dragusha.
“Vështirë është shumë, kur ski kushte e ski ku kontrollohesh ma mirë pret në rend, përndryshe përpara u kanë ma mirë, tash po duhet edhe na me qeto kushte me u ambientua”, thotë Sadie Havolli.
“Po nuk është mirë mos me pas, mirë është me pas, por për neve të vjetrit është shtirë kudo që të bjen me pritë nuk është mirë”, thotë Imer Bislimi.
Nga ana tjetër, drejtori i QKMF-së, Bujar Gashi thotë se tek pajisjet mjekësore jo rrallë herë edhe ju paraqiten probleme sa i përket funksionimit, megjithatë pret që e njëjta të kthehet në përdorim sa më shpejt që është e mundur.
“Në pjesën e radiologjisë ku funksionon edhe radiologjia konvencionale, edhe mamografia është edhe ultrazëri. Si çdo pajisje tjetër ka ato prishjet çështjet teknike të tyre që ndodhin kohë pas kohe, është jashtë funksionit që disa ditë, aparaturat janë të gjitha me kontrata të servisimit, janë në mbikçyrje të servisimit”, thotë Gashi.
Tëvë1 ka kontaktuar edhe drejtorin e Shëndetësisë në komunën e Prishtinës, Izet Sadiku, i njëjti është zotuar se e njëjta do të jetë në shërbim të qytetarëve shumë shpejt.
“Shumë shpejt do të rregullohen, sepse ato pajisje janë të vjetra dhe do të zëvendësohen me pajisje të reja”.
Ndërkohë, deri në funksionimin e plotë të këtyre aparaturave, pacientët që kanë nevojë të marrin shërbime të ultrazërit në Radiologji, duhet t’i drejtohen qendrës më të të mëdha klinike në vend./teve1/