Përpjekjet globale të vaksinimit kanë shpëtuar rreth 154 milionë jetë, duke përfshirë 101 milionë foshnja, tregon një studim i ri i udhëhequr nga Organizata Botërore e Shëndetësisë (OBSH).
Imunizimi ka kontribuar më shumë në shëndetin dhe mbijetesën e të porsalindurve se çdo përparim tjetër mjekësor, përfunduan studiuesit shkruan burimi Health Day përcjell Gazeta Shneta.
Vaksina e fruthit ka pasur ndikimin më të rëndësishëm në reduktimin e vdekjeve të foshnjave, duke përbërë 60% (94 milionë) të jetëve të shpëtuara nga imunizimi, thanë studiuesit.
Në përgjithësi, vaksinat kanë shpëtuar ekuivalentin e gjashtë jetëve çdo minutë të çdo viti për gjysmë shekullin e kaluar, ka zbuluar studimi i ri i OBSH-së.
“Vaksinat janë ndër shpikjet më të fuqishme në histori, duke i bërë të parandalueshme sëmundjet e dikurshme të frikshme”, tha drejtori i përgjithshëm i OBSH-së, Dr. Tedros Adhanom Ghebreyesus.
“Falë vaksinave, lija është çrrënjosur, poliomieliti është në prag, dhe me zhvillimin më të fundit të vaksinave kundër sëmundjeve si malaria dhe kanceri i qafës së mitrës, ne po i shtyjmë kufijtë e sëmundjes,” tha Ghebreyesus.
“Me kërkime të vazhdueshme, investime dhe bashkëpunim, ne mund të shpëtojmë miliona jetë të tjera sot dhe në 50 vitet e ardhshme.”
Gjatë pesë dekadave të fundit, vaksinimi kundër 14 sëmundjeve ka kontribuar drejtpërdrejt në reduktimin e vdekjeve të foshnjave me 40% në mbarë botën dhe më shumë se 50% në rajonin afrikan, zbuluan studiuesit.
Këto vaksina luftojnë difterinë, gripin, hepatitin B, encefalitin japonez, fruthin, meningjitin A, pertusisin, sëmundjen pneumokokale invazive, poliomielitin, rotavirusin, rubeolën, tetanozin, tuberkulozin dhe ethet e verdha.
Çdo jetë e shpëtuar përmes imunizimit prodhoi mesatarisht 66 vite shtesë të shëndetit të plotë, vlerësuan studiuesit, duke shtuar në një total prej 10.2 miliardë vitesh të plota shëndetësore të gëzuara nga popullsia e planetit gjatë 50 viteve të fundit. /Gazeta Shneta/