Evropa po përballet me një valë të re të të nxehtit, ndërsa temperaturat pritet të afrohen deri në 40 gradë Celsius në disa rajone gjatë ditëve në vijim.
Ekspertët shëndetësorë paralajmërojnë se valët e të nxehtit nuk janë vetëm të pakëndshme, por përbëjnë një nga fenomenet më vdekjeprurëse të motit në Evropë, duke rritur rrezikun për goditje nga nxehtësia, dehidrim dhe përkeqësim të sëmundjeve kronike.
Sipas mjekut të familjes Tiago Villanueva, president i Unionit Evropian të Mjekëve të Përgjithshëm dhe të Familjes, shumica e problemeve shëndetësore të lidhura me temperaturat e larta mund të parandalohen me masa të thjeshta mbrojtëse.
Kur temperaturat mbeten të larta për disa ditë me radhë, organizmi e ka më të vështirë të rregullojë temperaturën e brendshme të trupit, gjë që rrit rrezikun e lodhjes nga nxehtësia dhe goditjes nga dielli. Nxehtësia ekstreme ushtron gjithashtu presion shtesë mbi zemrën dhe veshkat, duke përkeqësuar gjendjen e personave me sëmundje ekzistuese.
Ekspertët rekomandojnë që qytetarët të shmangin qëndrimin jashtë gjatë orëve më të nxehta të ditës, të mbajnë dritaret dhe perdet të mbyllura gjatë pikut të temperaturave dhe të ajrosin ambientet në orët e hershme të mëngjesit ose në mbrëmje.
Po ashtu këshillohet përdorimi i rrobave të lehta, me ngjyra të çelëta dhe prej materialeve që lejojnë frymëmarrjen e lëkurës, si pambuku apo liri.
Organizata Botërore e Shëndetësisë rekomandon konsumimin e të paktën dy deri në tre litrave ujë në ditë gjatë periudhave me temperatura të larta, duke shmangur konsumimin e tepërt të alkoolit dhe kafeinës, të cilat mund të përkeqësojnë dehidratimin.
Mjekët bëjnë thirrje për kujdes ndaj simptomave paralajmëruese si marramendja, të përzierat, lodhja, dobësia dhe konfuzioni, të cilat mund të jenë shenja të hershme të goditjes nga nxehtësia. Në raste të tilla rekomandohet ftohja e menjëhershme e trupit, marrja e lëngjeve dhe kërkimi i ndihmës mjekësore nëse simptomat përkeqësohen.
Më të rrezikuarit nga temperaturat ekstreme konsiderohen personat mbi 65 vjeç, pacientët me sëmundje kronike, foshnjat dhe fëmijët e vegjël, punëtorët që punojnë jashtë si dhe personat që përdorin medikamente që mund të ndikojnë në aftësinë e organizmit për të rregulluar temperaturën e trupit.
Meteorologët paralajmërojnë se temperaturat e larta do të vazhdojnë të dominojnë në pjesë të mëdha të Evropës, duke shtuar nevojën për kujdes të shtuar dhe respektim të rekomandimeve shëndetësore.