Në vitin 2024, Gjermania eksportoi mbi 15 milionë ton produkte farmaceutike drejt Kinës, ndërsa Kina i shiti Gjermanisë mbi 33 milionë ton ilaçe. Qoftë barna si qetësues dhimbjesh, antibiotikë apo ilaçe për diabetin, farmacitë gjermane mezi funksionojnë pa barnat e prodhuara në Kinë.
Çdo ditë, në linjat e prodhimit kinez dalin miliona pilula dhe pluhura shumëngjyrëshe që më pas përfundojnë në tregun gjerman. Sipas një raporti të shoqatës farmaceutike “Pro Generika e.V., rreth 76 për qind e përbërësve aktivë të antibiotikëve që importon Gjermania vijnë nga Kina. Edhe kur ilaçet prodhohen në Indi apo SHBA, ato zakonisht përmbajnë përbërës kinezë, raporton Euronews Health transmeton Gazeta Shneta.
Shembulli i ilaçit për diabet Metformin e tregon qartë këtë varësi. Nga 22 prodhuesit më të mëdhenj në botë, 15 ndodhen në Indi, dy në Kinë dhe vetëm tre në Evropë.
Për më tepër, 80 për qind e përbërësit kimik dicianodiamid, i domosdoshëm për prodhimin e Metforminit, vjen nga Kina.
Ilaçet si mjet presioni
Barnat gjenerike janë ato që nuk mbrohen më nga patenta dhe mund të prodhohen nga çdo kompani.
Sipas Aleancës për Barna Esenciale, rreth 90 për qind e barnave të kategorizuara si “esenciale” në BE janë gjenerike. Këto ilaçe janë thelbësore për kujdesin shëndetësor, por mund të përballen me mungesa furnizimi. Çmimet e ulëta të tyre varen nga prodhimi në vende si Kina dhe India, ku kostoja e punës është më e lirë dhe rregullat mjedisore më të lehta.
Prodhimi i lirë jashtë vendit ishte pasojë e një mentaliteti “sa më lirë, aq më mirë”, shpjegon profesori Michael Müller nga Universiteti i Freiburgut, ekspert në kimi farmaceutike dhe mjekësore. “Ideja për të rikthyer fabrikat në Gjermani është dëshirë politike, jo realitet. Kostot do të ishin të mëdha dhe na mungon fuqia e kualifikuar punëtore,” shton ai.
Sipas Müller, edhe nëse Gjermania do të rindërtonte kapacitetet e saj prodhuese, situata nuk do të ndryshonte ndjeshëm: “Ne nuk mund të prodhojmë vetë lëndët e para të nevojshme. Varësia jonë nga Kina është e qartë.”
Në vitin 2024, Gjermania eksportoi drejt Kinës produkte farmaceutike me vlerë gati 4.1 miliardë euro, ndërsa importet nga Kina kapën shifrën e 722 milionë eurove. Megjithatë, shifrat monetare janë mashtruese — Kina i shiti Gjermanisë 33 milionë ton ilaçe, ndërsa Gjermania vetëm 15 milionë ton.
Nëse një fabrikë ndalon prodhimin, mungojnë alternativat, duke shkaktuar kriza furnizimi.
Unioni Federal i Farmacistëve Gjermanë paralajmëron se rreth 500 ilaçe me recetë janë të vështira për t’u gjetur, sidomos antibiotikët për fëmijë dhe medikamentet për ADHD e astmë.
“Dikur Gjermania ishte farmacia e botës; tani farmacia e botës është në Kinë dhe Indi,” tha Thomas Preis, president i Unionit Federal të Farmacistëve. /Gazeta Shneta/