Drejtori i Shërbimit Spitalor Klinik Universitar të Kosovës, Dr. Curr Gjocaj, sot ka mbajtur mbledhje me anëtarët e Bordit, Shemsi Veseli dhe Dr. Saudin Maliqi Kryesues i komisioneve në nivel QKUK-së.
Zyra për Media e SHSKUK-së ka bërë publike transkriptën e bisedës që është zhvilluar në këtë takim, shkruan Gazeta Shneta.
Gjocaj e nis bisedën duke pohuar se në QKUK vijnë shumë pacientë për t’u shëruar, por sipas tij literatura njeh komplikime dhe më 7 shtator kur vdiqën 3 pacientë, ka ndodhur pikërisht kjo gjë.
“Me 07 shtator dyshohet me disa komplikime në disa salla operative. Nga 17 operacione, 1 pacient ka vdekur në sallë, 1 më vonë, nga të gjithë këta pacientë, komplikime 6 tjerë me simptoma të njëjta pas operacione. Rastet tjera kanë shkuar mirë . Për dy raste të dyshimta po merret prokuroria e shtetit është bërë autopsia shpresojmë të kemi rezultatet finale”, ka deklaruar Gjocaj, ndonëse prokuroria po i heton tri raste.
Gjocaj vazhdon bisedën duke thënë se ende nuk dihen shkaqet e sigurta, por megjithatë hedh argumente në mbrojtje të gazit i cili prodhohet pa licencë në Kosovë.
“Për hirë të së vërtetës, ai përdoret në gjitha institucionet e Republikë , privat dhe publik”, thotë Gjocaj, për gazin i cili prodhohet nga kompania “Bubeari Komerc” në Kaçanik.
Argumentet në mbrojtje të kompanisë e cila e nuk ka pasur licencë për shitjen e këtij gazi në Kosovë e as nuk ka qenë i licencuar nga AKPPM-ja, Gjocaj i çon tutje duke thënë se me këtë gaz është punuar edhe në salla tjera.
“Duke mos qenë arsye subjektive dhe objektive, është lënë të dyshohet se gazi, me këtë gaz është punuar edhe në sallat tejra. Hetuesia ka marrë bombolat e gazit, besoj se do dalë shpejtë rezultati , janë marrë mostrat origjinale”, ka deklaruar drejtori i QKUK-së.
Gjocaj shprehet se nuk ka as shenja se ka mundur të ketë neglizhencë nga ana e stafit.
Megjithatë, ai shton se derisa të dalin rezultatet përfundimtare të hetimeve, nga autopsia dhe prokuroria, gjithçka mbetet e dyshimtë.
Gjatë bisedës në këtë takim, Gjocaj nuk duket të jetë i shqetësuar për marrjen e përgjegjësisë për këtë skandal. Ai thotë se nëse duhet kërkuar përgjegjësi, atëherë kjo duhet të kërkohet në OSHP e cila ka marr vendim që tenderi t’i jepet kësaj kompanie.
“Normalisht se çdo qytetar, sado i thjeshtë koftë , për çdo lloj problemi në shtet ndjen keqardhje, unë jam trup administrative, nëse është çështje përgjegjësie, pse OSHP më detyroi të marrë atë operator. Po luhet loja që disa qarqe po kërkojnë më do e mos fajtorin në thonjëza”, ka deklaruar ai.
Gjocaj tutje shton se QKUK-ja më herët s’ka pasur probleme dhe po tentohet të përfitohet nga ky rast. Ai kërkon nga bashkëpunëtorët e tij që të jenë të kujdesshëm me informatat në mënyrë që të mos spekulohet.
Krejt në fund ai sërish insiston se janë 2 vdekje të dyshimta.
Anëtari i Bordit drejtues, Shemsi Veseli, në fjalën e tij në këtë takim hedh dyshime se vdekja e pacientëve mund të shfrytëzohet nga njerëz që bëjnë punë të ndyta në të mirë të spitaleve private.
“Jetësisht edhe bordi edhe komisionet e zgjedhura profesionale janë të interesuar të zgjidhet ky problem, nuk përjashtojmë që njerëz në këto ujëra të ndotura të notojnë dhe të orientojnë pacientët në spitale private”, ka deklaruar Veseli.
Saudin Maliqi, Kryesues i komisioneve në nivel QKUK-së ka njoftuar për hetimet që po zhvillohet. /Gazeta Shneta/