Një foshnje e cila ishte duke u trajtuar në Qendrën Klinike dhe Universitare të Kosovës, ka vdekur dje, raporton Express.
Lidhur me rastin, Policia e Kosovës ka nisur hetime. Me vendim të prokurorit, trupi i pajetë është dërguar në Institutin e Mjekësisë Ligjore.
“QKUK 19.01.2024 – 09:00. Viktima foshnje e cila ishte duke u trajtuar në QKUK, në rrethana ende të panjohura ka ndërruar jetë. Me vendim të prokurorit, trupi i pajetë është dërguar në IML”, thuhet në raport.
Rastin e ka konfirmuar për Sinjalin edhe drejtori i Klinikës, Zef Ndrejaj, i cili tha se faktikisht bëhet fjalë për abort dhe sipas tij, ka gjasa që nëna e cila ka ikur nga spitali, ka stimuluar lindjen e parakohshme.
Ndrejaj bëri të ditur se bazuar në rregullat e Klinikës, kanë lajmëruar edhe Policinë lidhur me rastin dhe të njëjtit po e shqyrtojnë.
“Faktikisht është abort në javën e 20 dhe e ka braktis nana e vet, edhe nuk ka lindë e vdekun por mbas një kohe, fëmija 20 javësh normalisht që nuk mundet me mbijetu. Ajo [nëna] e ka braktisë dhe për shkak që e ka braktisë, Policia është kah merret me to. Normalisht rasti është në Polici se na e kemi rregull me lajmëru Policinë, organet edhe janë t’u e shqyrtu rastin kush është ajo, cka është ajo se ka ikë edhe prej klinike ajo. Mirëpo është në javën e 22, merret si abort ajo. Me siguri ka stimulu diku lindjen jashtë, ka marrë naj tabletë, ka ardhë këtu dhe qashtu. Po me ato raste merren Policia. Është abort. Deri në javën 23-24 merret si abort”, tha Ndrejaj për Sinjalin.