Një person i infektuar me virusin e gripit të shpendëve A(H5N2) ka vdekur në Meksikë, sipas Organizatës Botërore të Shëndetësisë (OBSH).
Ky është rasti i parë i infektimit me virusin e influencës A(H5N2) i konfirmuar nga rezultatet laboratorike. Ky është gjithashtu infeksioni i parë njerëzor i virusit H5 të shpendëve i raportuar në Meksikë, shkruan burimi Health News përcjell Gazeta Shneta.
Më 17 prill, pacienti 59-vjeçar pati temperaturë, gulçim, diarre dhe të përziera. Një javë më vonë, pacienti kërkoi ndihmë mjekësore dhe u shtrua në spital në Mexico City. Ai vdiq të njëjtën ditë për shkak të komplikimeve të gjendjes së tij.
Pacienti kishte sëmundje kronike të veshkave dhe diabet tip 2 dhe kishte qenë i shtrirë në shtrat për tre javë për arsye të tjera përpara se të shfaqte simptoma akute, sipas të afërmve të tij.
Mes tjerash, pacienti nuk kishte histori të ekspozimit ndaj shpendëve ose kafshëve të tjera. Megjithatë, në mars 2024, dy shpërthime të A(H5N2) në shpendë u zbuluan në shtetin e Meksikës, ku banonte pacienti, dhe në shtetin kufitar të Michoacán.
Zyrtarët shëndetësorë thonë se nuk ka qenë e mundur të përcaktohet nëse ky rast njerëzor ka lidhje me shpërthimet e fundit të gripit të shpendëve.
OBSH thotë se rreziku aktual për popullatën e përgjithshme të paraqitur nga ky virus është i ulët.
Asnjë rast i mëtejshëm nuk u raportua gjatë hetimit epidemiologjik, përfshirë kontaktet e ngushta të pacientit në spital. /Gazeta Shneta/