Në një takim të mbajtur sot ndërmjet KFAM, përfaqësuesve të Policisë së Kosovës, klinikave private dhe inspektoratit Shëndetësor, është marr vendim që palëve t’iu mundësohet që t’i tërheqin embrionet e ngrira në Gjinekologji të QKUK-së
Embrionet dhe qelizat e ngrira që janë konfiskuar nga Prokuroria dhe Inspektorati Shëndetësor në klinikat private, të cilat aktualisht po ruhen në Gjinekologji të QKUK-së, do të mund të tërhiqen nga pacientet. Ky vendim është marr sot në një takim ndërmjet Komisionit për Frytnim të Asistuar Mjekësor, përfaqësuesve të Policisë së Kosovës, përfaqësuesve të klinikave private dhe Inspektoratit Shëndetësor, shkruan Gazeta Shneta.
Gazeta ka mësuar nga burime brenda këtij takimi se palët duhet të bëjnë kërkesë në klinikat ku kanë filluar procedurën e frytnimit të asistuar, dhe pastaj kërkesa e tyre do të shqyrtohet dhe do të merret vendimi në KFAM. Pacientët poashtu duhet të kenë një dokument ku do të tregojnë në cilën klinikë do të vazhdohet procedura e IVF-së.
Embrionet do të tërhiqen nga tanket në prezencën e embriologut të klinikës përkatëse private, si dhe embriologut të Gjinekologjisë në QKUK. Ky vendim është marr pas kërkesës së katër pacienteve për tërheqje të embrioneve.
Kujtojmë se tanket me embrione dhe qeliza janë konfiskuar nga klinikat private pas bastisjes nga Policia e Kosovës si dhe arrestimit të disa personave, përfshirë pronarë të klinikave dhe mjekë të njohur vendor dhe të huaj.
Ata u arrestuan nën dyshimet për transplantime të jashtëligjshme të qelizave, ndërsa janë gjobitur nga Inspektorati Shëndetësor me nga 20 mijë euro për shkelje të Udhëzimit Administrativ 06/2012 dhe Ligjit për Shëndetin Riprodhues. Poashtu licencat e tyre për IVF janë pezulluar dhe ende nuk dihet nëse do të rilicencohen nga Ministria e Shëndetësisë. /Gazeta Shneta/