Vetëm katër vende—Brazili, Mauritius, Holanda dhe Turqia—kanë miratuar të gjitha masat kundër duhanit të rekomanduara në luftën kundër të pirjes së duhanit, ka thënë të hënën Organizata Botërore e Shëndetësisë (OBSH).
Në një raport të ri, agjencia shëndetësore e OKB-së u kërkoi vendeve të rrisin përdorimin e masave të njohura për të reduktuar përdorimin e duhanit, duke përfshirë zbatimin e ndalimeve të reklamave, paralajmërimet shëndetësore në paketat e cigareve rreth efekteve anësore, rritjen e taksave të duhanit dhe ofrimin e ndihmës për ata që duan të lënë duhanin, raporton AFP përcjell Gazeta Shneta.
Mes tjerash, OBSH ka thënë se Mauritius dhe Holanda i ishin bashkuar tani Brazilit dhe Turqisë në zbatimin e të gjitha masave të rekomanduara.
OBSH ka njoftuar se 5.6 miliardë njerëz, ose 71 për qind e popullsisë së botës, tani mbrohen nga të paktën një masë e kontrollit të duhanit – pesë herë më shumë se në vitin 2007.
Agjencia shëndetësore ndër të tjera ka thënë se shkalla globale e prevalencës së pirjes së duhanit kishte rënë nga 22.8 përqind në 2007 në 17.0 përqind në 2021.
“Ngadalë por me siguri, gjithnjë e më shumë njerëz po mbrohen nga dëmet e duhanit,” tha shefi i OBSH-së, Tedros Adhanom Ghebreyesus, duke shtuar se organizata e tij ishte e etur të mbështeste përpjekjet kombëtare për të “mbrojtur njerëzit e tyre nga kjo fatkeqësi vdekjeprurëse”.
Pirja e duhanit mbetet shkaku kryesor i vdekjeve të parandalueshme, duke vrarë 8.7 milionë njerëz çdo vit, duke përfshirë 1.3 milionë që vdesin nga thithja e tymit të dorës së dytë. /Gazeta Shneta/