Nënkryetarja e Lëvizjes Vetëvendosje, Fatmire Kollçaku-Muhaxha, në ditën ndërkombëtare të Shëndetit ka kritikuar kompanitë e sigurimit shëndetësor.
Ajo ka thënë se duke u mos u zbatuar ligji për Sigurim Shëndetësor Publik bënë që shumë qytetarë të marrin trajtimet e duhura, sidomos me sëmundjet malinje, me kosto të lartë jashtë vendit.
Sipas Muhaxhës, këto kompani që ofrojnë sigurim shëndetësor privat po zhvasin xhepat e qytetarëve, duke kërkuar klientë që janë krejtësisht të shëndoshë, nën moshën 65 vjeçare.
“BQK-ja e cila mbikëqyrë këto kompani ende nuk ka përmbushur kërkesën e cila del nga Rezoluta e Kuvendit të Kosovës për raportim, lidhur me veprimtarinë e kompanive të sigurimeve. Ky është edhe obligim ligjor”, ka thënë ajo.
Më tej, ajo ka kërkuar përgjegjësi nga këto kompani të cilat nëse klientët e tyre preken nga ndonjë sëmundje, ua ndërpresin kontratat.
“Para ligjit duhet të jemi të barabartë, dhe të kemi qasje në të mirat shëndetësore. Ligji për Sigurim Shëndetësor Publik duhet të zbatohet, dy rezolutat e kaluara në Kuvendin e Republikës të merren parasysh, dhe BQK-ja t’i mbikëqyrë kompanitë private që ofrojnë sigurime shëndetësore”, ka përfunduar ajo./Koha.net/