Lëvizja Vetëvendosje ka dal me një njoftim zyrtar pas takimit të kryetarit Albin Kurti me kryetarët e sindikatave të punëtorëve të shëndetësisë, arsimit, policisë dhe të tjerë.
Në këtë njoftim thuhet se përfaqësuesit e sindikatave kanë shprehur shqetësimin e tyre në lidhje me mundësinë e moszbatimit të Ligjit për Paga, pasi i njëjti u dërgua në Gjykatën Kushtetuese nga Avokati i Popullit, transmeton Gazeta Shneta.
Kurti në anën tjetër ka premtuar bashkëpunim me sindikatat, ndërsa në njoftim thuhet se çështja e ligjit varet nga formimi i institucioneve pas zgjedhjeve të 6 tetorit si dhe nga vendimi i Gjykatës Kushtetuese.
Njoftimi i plotë nga VV:
Sot, kryetari i Lëvizjes VETËVENDOSJE!, Albin Kurti, së bashku me anëtarë të kryesisë dhe komiteteve profesionale, pritën në takim përfaqësuesit e Sindikatës së Bashkuar të Arsimit, Shkencës dhe Kulturës, Federatës së Sindikatave të Shëndetësisë së Kosovës dhe Sindikatës së Policisë së Kosovës.
Fillimisht, përfaqësuesit e sindikatave shprehën falënderimet e tyre për gatishmërinë e përhershme të Lëvizjes VETËVENDOSJE! për t’i takuar dhe trajtuar problemet e punëtorëve, për dallim nga Kryeministri në ikje dhe Presidenti aktual, nga të cilët nuk kanë marrë përgjigje në ftesat për takim. Ata njoftuan Kurtin dhe të pranishmit e tjerë me qëndrimet e tyre mbi Ligjin mbi Pagat, i cili aktualisht po shqyrtohet nga Gjykata Kushtetuese. Ata shprehën shqetësimet e tyre me zhvillimet e fundit në raport me këtë ligj dhe njoftuan se janë në kontakt me Këshillet Drejtuese të secilës nga këto tri sindikata, me të cilat do t’i shqyrtojnë veprimet e ardhshme.
Të dyja palët u pajtuan se në raport me këtë çështje, çfarëdo hapi i mëtutjeshëm është i kushtëzuar nga dy procese të rëndësishme për vendin: formimi i institucioneve të Republikës së Kosovës dhe vendimi i Gjykatës Kushtetuese për Ligjin mbi Pagat. Gjithashtu, ato u pajtuan që, si asnjëherë më parë, për të gjitha çështjet të vazhdojë bashkëpunimi i afërt mes Qeverisë së ardhshme dhe të gjitha sindikatave.