Ministri i Shëndetësisë Arben Vitia ka pritur në një takim kryetarin e Odës së Fizioterapeutëve të Kosovës Feim Gashin.
Për këtë takim ka njoftuar Gashi përmes një postimi në Facebook ku ka bashkëngjitur edhe një fotografi me ministrin Vitia, shkruan Gazeta Shneta.
Sipas Gashit në këtë takim me ministrin kanë biseduar për kërkesat e tyre në lidhje me edukimin e vazhdueshëm dhe specializimet për fizioterapeutët.
“Sot kishim një takim me ministrin e Shëndetësisë, z. Arben Vitia, me të cilin diskutuam për problemet në fushën e Fizioterapisë. Unë si kryetar i OFTK-së i adresova kërkesat e fizioterapeutëve si profesionist të pavarur shëndetësor, avancim të legjislacionit për ofrim të kujdesit fizioterapeutik dhe edukim të vazhdueshëm dhe Specialistik. Gjithashtu diskutuam edhe për organizimin e Kongresit të II-të Ndërkombëtar të Fizioterapisë, që do të mbahet më datat 5 dhe 6 Maj 2023”, ka shkruar Gashi.
Kujtojmë se kërkesat e fizioterapeutëve i ka adresuar në Kuvendin e Kosovës edhe deputeti i PDK-së Bekim Haxhiu, veçanërisht në lidhje me specializimet. Për këto kërkesa Vitia kishte thënë në Kuvend se është i hapur për bashkëpunim për realizimin e tyre. /Gazeta Shneta/