Kompania “Arberia Com” ka ngritur kallëzim penal ndaj ministrit në detyrë Arben Vitia, ish-sekretarit Naim Bardiqi dhe shefit të Prokurimit në MSh Berat Marmullaku.
Vitia dje është intervistuar nga hetues të Policisë së Kosovës, pas një kallëzimi penal të ngritur nga kompania “Arberia Com”, së cilës Ministria e Shëndetësisë ia kishte shkëputur kontratën për ndërtimin e spitalit të Ferizajt, shkruan Gazeta Shneta.
Vet Vitia e ka pranuar se është intervistuar nga Policia, por ka thënë se nuk mund të jap më shumë detaje lidhur me rastin.
Kjo kompani ka ngritur kallëzim penal edhe ndaj ish-Sekretarit të MSh-së Naim Bardiqi, si dhe ndaj shefit të Prokurimit Berat Marmullaku.
MSh kësaj kompanie ia shkëputi kontratën në fund të vitit 2021, meqë e njëjta kishte dështuar t’i kryente obligimet e veta, e madje kishte kërkuar para shtesë për ta përfunduar projektin.
MSh për këtë projekt pati dal me sqarime në gusht të vitit 2024 ku pati paraqitur disa nga problemet që ishin shkaktuar nga projekti me defekte dhe i pamenduar mirë.
“Në vitin 2016, Komuna e Ferizajt paraqiti një projekt për ndërtimin e Spitalit të Përgjithshëm, të cilin Ministria e Shëndetësisë e pranoi për shqyrtim. Fatkeqësisht, projekti kishte sa mangësi aq edhe defekte. Ai ishte po ashtu projekt i padetajuar. I njëjti i ngjante më shumë një projekti ideor sesa një projekti zbatues. Megjithë këto mangësi punimet nisën në vitin 2018. Ministria e Shëndetësisë u përball me probleme të tjera, një prej tyre ishte shfaqja e ujërave në bodrumin e objektit. Shkak i këtij problemi të ri ishte ndryshimi pa asnjë studim i lokacionit nga Komuna e Ferizajt”, thuhej në komunikatën e MSh-së atë kohë.
Për shkak të këtyre problemeve ishte marr vendim për ndërprerjen e kontratës.
“Gjithashtu, kompania e kontraktuar për ndërtimin, “Arbëria Com”, dështoi në përmbushjen e detyrimeve të saj sipas kontratës, duke kërkuar pagesa shtesë dhe duke shkaktuar stërzgjatje të procesit. Për shkak të këtyre problemeve, dhe me dyshimin për mashtrim nga ana e Operatorit Ekonomik, në fund të vitit 2021, kontrata u ndërpre dhe lënda u dërgua në organet përkatëse për hetim të mëtejshëm”, thuhej në komunikatë.
Në këtë njoftim poashtu ishte bërë e ditur se për rastin ishin njoftuar edhe organet e hetuesisë, së cilave iu bëhej thirrje për të vepruar. /Gazeta Shneta/