Dy anëtarët e Komitetit për Shëndetësi të Lëvizjes Vetëvendosje, mjekët Dr. Arben Vitia dhe Dr. Baton Kelmendi, kanë mbajtur sot një konferencë për media ku kanë folur për sektorin e shëndetësisë, në veçanti Qendrën Klinike Universitare të Kosovës.
Vitia ka folur për gjendjen e rëndë në shëndetësi që sipas tij ka vazhduar edhe në mandatin e qeverisjes së ministrit Uran Ismaili. Ai ka thënë se prokurimi në shëndetësi është shndërruar në instrument të dëmtimit të sistemit të shëndetësisë, buxhetit dhe padrejtësive të shumëfishta ndaj pacientëve.
“Aty janë shpërblyer kompani të cilat nuk garantojnë minimumin e cilësisë përmes certifikatave bazike. Janë blerë stenta të cilët sipas dokumentacionit nuk garantojnë cilësinë e duhur. Paramendoni, ‘stenta’ vendoset në arteriet koronare në zemër e pacientit. Pikërisht ato nuk e kanë të garantuar cilësinë dhe sigurinë përmes certifikimeve”, ka deklaruar Vitia.
“Rasti i furnizimit me shtretër për pacientët ku u porositen mbi 700 shtretër për persona me peshë deri në 300 kg. Standardi është maksimumi deri në 250 kg. Ky furnizim shkaktoi situata komike ku dyert nuk kishin dimensionet e shtretërve. E tragjike mbetet fakti se në fund, pacientët mbesin pa shtretër, gjersa blerja e tyre është bërë mbi vlerën reale të tregut. Bëhet fjalë për mbi 1 milionë euro”.
Tutje, Vitia tha se “simulohet një situatë emergjente e furnizimin për produktet e hemodializës, shfrytëzohet për tenderë me procedurë emergjente të negociuar. I jepet tenderi një kompanie të formuar në kohën e qeverisë së rrëzuar tashmë. Rastësia e sjell që kompania ka për themelues dy persona të afërt me ish-qeverinë. Domethënë, produkte shumë të nevojshme dhe delikate të cilat futen në organizmin e njeriut, fillimisht rrezikohet të mbetet pa to për shkak të mungesës së planifikimit dhe pastaj përmes një procedure emergjente që lë për të dëshiruar, blihen me çmime edhe më të larta.”
Ndërkaq kirurgu Baton Kelmendi, foli për sfidat e përditshme për pacientët e mjekët, për mungesat e shumta të barnave dhe materialeve. “Situata në Qendrën Klinike Universitare është shembulli më përfaqësues ku cinizmi ka mbërritur deri aty sa marketingu personal i ish ministrit Ismajli merret me përurime të punëve që janë kontraktuar ose kanë filluar të punohen vite më parë, ngjyrosjen e vijave të bardha pak para se të përurohet asfaltimi në parkingun e QKUK, e të tjera si këto”, tha Kelmendi.
Sipas tij, pa vendimmarrje të drejtë dhe transparencë që sjell krijimin e kushteve minimale për punë e kurim, është e kotë lyerja e korridoreve dhe promovimi i sallave nga disa herë, duke përmendur sallën e dytë të kardiokirurgjisë që u promovua dy herë para se të vihej në punë.
“Shumë prej jush jeni përballur dhe ende po përballeni me skena e pasoja të rënda gjatë kurimit aty. Njëjtë edhe mjekët e punëtorët shëndetësorë”, ka deklaruar Kelmendi.
Më poshtë është video e plotë e konferencës së mbajtur nga Vitia dhe Kelmendi. /Gazeta Shneta/