Ud. drejtoresha e SHSKUK-së ia ka nënshkruar vendimin drejtorit të ri të Gjinekologjisë Zef Ndrejaj, ende pa u shqyrtuar ankesa e kundërkandidatit Atdhe Keqa.
Një nga vendimet e para të ud. drejtoreshës së Shërbimit Spitalor Klinik Universitar, Pranvera Zejnullahu-Raçi, ishte nënshkrimi i vendimit për drejtorin e ri të Klinikës së Gjinekologjisë Zef Ndrejaj, shkruan Gazeta Shneta.
Zejnullahu-Raçi u emërua ud. drejtoreshë e SHSKUK-së më dy gusht, ndërsa tre ditë më vonë ia nënshkroi vendimin për pozitën e drejtorit të klinikës ish-shefit të saj në repartin e Operativës në KOGJ, Zef Ndrejaj.
“Në lidhje me pyetjet tuaja, ju konfirmojmë se Dr. Zef Ndrejaj është zgjedhur drejtor i Klinikës së Gjinekologjisë pas zhvillimit të procedurave rekrutuese, bazuar në legjislacionin në fuqi. Kontrata e punës i është lidhur pas përfundimit të afatit të ankesave, të paraparë me Ligj”, thuhet në përgjigjen e zyrës së drejtoreshës së SHSKUK-së.
Afati i ankesave kishte përfunduar por jo edhe shqyrtimi i tyre. Ndonëse Komisioni ende nuk i kishte kthyer përgjigje Keqës, Zejnullahu-Raçi ia kishte nënshkruar kontratën Ndrejajt.
“Doktorit në fjalë i është kthyer dy herë përgjigje, në dy ankesat e bëra, duke ju përmbajtur afateve ligjore”, thuhet në përgjigjen e SHSKUK-së.
Në fakt Keqës i është kthyer përgjigje, por kjo ka ndodhur pas nënshkrimit të kontratës për drejtorin e ri.
Kryetari i Komisionit të Ankesave Nazmi Kolgeci, ka deklaruar se përgjigjja për ankesat e Keqës është kthyer gjatë ditës së djeshme. Ai ka deklaruar se Keqa nuk kishte marr pjesë fare në intervistë me gojë dhe nuk kishte arritur të paraqiste fakte për shkelje në konkurs.
Në anën tjetër vet Keqa ka deklaruar se është ende në pushim dhe nuk ka pranuar asnjë përgjigje për ankesat e tij. Ai ka deklaruar se këtë çështje do ta dërgoj në instanca të tjera.
Në praktikën e mëhershme në bazë të Ligjit të Punës, kontratat e reja për drejtor nuk janë nënshkruar pa përfunduar afati dhe shqyrtimi i ankesave të palëve. /Gazeta Shneta/