Spitali i Përgjithshëm në Pejë përgjatë katër muajt e parë të këtij viti ka pranuar 119 raste me tumor, ku prej tyre ishin 59 femra dhe 60 meshkuj, sipas raportit të lëshuar nga ky spital.
Ndërkaq, sipas këtij raporti, numri i rasteve të fëmijëve nën moshën nën 18-vjeç është i vogël, shkruan Gazeta Shneta.
“Sa i përket moshës prej 18-34 vjeç janë 10 raste, prej moshës 35 deri 44 vjeçar janë 27 raste, 45-55 vjeç janë 28 raste, 55-64 vjeç janë 19 raste ndërsa mbi 65 vjeç 38 raste. Nën moshën 18 vjeç fatmirësisht rastet janë në numër të pakët”, thuhet më tutje në njoftim.
Për sa i përket lindjeve, raporti për Spitalin e Pejës tregon se që prej fillimit të vitit e deri më tani kanë pasur 159 lindje, duke cekur se mesatarja ka rënë në 1.7 herë.
“Ndërsa numri i të lindurve në Spitalin e Përgjithshëm në Pejë në prill ka qenë 159 dhe duhet cekur se mesatarja e lindjeve në vitin 2018 është 3.7 që është më e vogël se vitin e kaluar kur kishte 5.4 lindje mesatarisht në ditë”, vë në pah raporti.
Gjithashtu, janë evidentuar 28.139 shërbime të infermierisë, që kanë mundësuar 16.885 vizita mjekësore.
Reparti i Emergjencës cilësohet më i ngarkuari, sipas faqës zyrtare në Facebook të Spitalit të Pejës, me trajtimin e 4.499 rasteve deri më tani, apo mesatarisht 148 raste për 24 orë./Gazeta Shneta/