Klinika Infektive e Qendrës Klinike Universitare të Kosovës ka njoftuar se është duke trajtuar një situatë me helmime të dyshuara nga ushqimi, ku deri më tani janë hospitalizuar 31 pacientë. Në mesin e tyre janë edhe pesë persona nga Komuna e Hanit të Elezit, ndërsa analizat laboratorike kanë konfirmuar 11 raste pozitive me bakterin Salmonella.
Sipas njoftimit të QKUK-së, gjatë datave 13, 14 dhe 15 korrik 2026, rreth 30 persona kanë kërkuar ndihmë mjekësore urgjente në Klinikën Infektive, pas shfaqjes së simptomave të ngjashme, transmeton Gazeta Shneta
Pas analizave të kryera, 11 raste kanë rezultuar pozitivë me bakterin Salmonella Enteritidis, i cili shkakton infeksion të zorrëve dhe lidhet shpesh me konsumimin e ushqimeve të kontaminuara.
“Ekipi shëndetësor konfirmon se të gjithë pacientët e shtruar janë duke marrë trajtimin e duhur dhe gjendja e tyre po shkon drejt përmirësimit,” ka bërë të ditur QKUK.
Në kuadër të këtyre rasteve, gjatë kësaj periudhe janë pranuar edhe pesë pacientë nga Hani i Elezit me simptoma të ngjashme.
Sipas deklaratave të pacientëve, dyshohet se numri i personave që kanë konsumuar ushqim në të njëjtin lokacion dhe që mund të jenë prekur është më i madh. Ndërkohë, ekipet shëndetësore po vazhdojnë ekzaminimet dhe monitorimin e gjendjes së pacientëve, ndërsa po punohet për identifikimin e burimit të saktë të infeksionit.
Klinika Infektive u ka bërë thirrje qytetarëve që të kenë kujdes me konsumimin e ushqimeve, veçanërisht gjatë temperaturave të larta, pasi nxehtësia favorizon shumimin e shpejtë të baktereve.
Qytetarët këshillohen që në rast të shfaqjes së simptomave si të vjella, diarre, temperaturë të lartë apo dhimbje të forta barku pas konsumimit të ushqimit, të kërkojnë ndihmë mjekësore./Gazeta Shneta/