Në gjashtëmujorin e parë të vitit 2025, Klinika e Radiologjisë pranë Qendrës Klinike Universitare të Kosovës ka ofruar shërbime për 80,740 pacientë, numër ky që tregon fluks të jashtëzakonshëm të kërkesave për ekzaminime diagnostike.
Kështu ka bërë të ditur Dr. Shkendije Nuza, drejtoreshë e kësaj klinike ku shpjegon se ekzaminimet me rëntgen dhe ato me CT jane shërbimet që kërkohen më shumë, shkruan Gazeta Shneta.
“Gjatë kësaj periudhe janë kryer mbi 8,456 rezonanca magnetike dhe rreth 12,856 ekzaminime me CT. Nga këto, mbi 7,101 raste janë trajtuar gjatë ndërrimeve, duke përfshirë ndërrimin paradite, pasdite dhe fundjavave, ndërsa pjesa tjetër prej 5,755 ekzaminimesh janë realizuar në raste spitalore dhe ambulatore.” shpjegon ajo.
Megjithëse Dr. Nuza thekson se shërbimet në klinikë janë të shumëllojshme.
“Klinika ofron një gamë të gjerë shërbimesh, duke filluar nga ekzaminimet me rëntgen, fluoroskopia e sistemit gastrointestinal dhe urogjenital, ultrazëri ambulantor dhe emergjent, CT dhe rezonancë magnetike, endografi, biopsi, si dhe mamografi dhe biopsi gjiri.” shtoi ajo.
Megjithë volumin e madh të kërkesave, Dr. Shkendije Nuza, thekson se mungesa e stafit mbetet një sfidë serioze.
“Para më shumë se 10 vitesh kemi pasur rreth 30 radiologë, ndërsa sot numërohen vetëm 25. Ndërkohë, gamë e shërbimeve ka shënuar rritje të madhe, po ashtu edhe numri i aparaturave diagnostikuese,” shpjegon Dr. Nuza./Gazeta Shneta/
Për këto dhe detaje të tjera shihni videon më poshtë: