Një studim i ri i prezantuar në Kongresin e Shoqatës Europiane të Kardiologjisë në Madrid tregon se mosha e madhe dhe niveli i ulët i kondicionit fizik janë faktorë të fuqishëm që lidhen me çrregullime të ritmit të zemrës (aritmi) dhe rrisin rrezikun kardiovaskular në të ardhmen.
Studimi përfshiu 1,151 persona të shëndetshëm midis 40 dhe 65 vjeç, të cilët nuk kishin simptoma të zemrës.
Pjesëmarrësit iu nënshtruan testeve të stresit fizik dhe monitorimit të vazhdueshëm të zemrës me Holter ECG, për të identifikuar ritme të parregullta si aritmitë atriale dhe ventrikulare, shkruan MedicalXpress transmeton Gazeta Shneta.
Rezultatet treguan se individët mbi 50 vjeç dhe ata me kondicion të dobët fizik kishin rrezik më të lartë për aritmi të shpeshta dhe komplekse, duke përfshirë tahikardi supraventrikulare (32%), fibrilacion atrial (4%) dhe tahikardi ventrikulare jo të qëndrueshme (6%).
Drejtori i studimit, Dr. Amit Moses, tha se rezultatet tregojnë rëndësinë e screening-ut të aritmisë për të rriturit mbi 50 vjeç, si dhe rolin mbrojtës të aktivitetit fizik në parandalimin e ritmeve të çrregullta të zemrës. Ai sugjeroi se ecja, vrapimi, çiklizmi dhe aktivitetet e tjera aerobike të rregullta mund të ndihmojnë në uljen e rrezikut.
Studiuesit theksuan se aritmitë atriale dhe ventrikulare, edhe tek individë të shëndetshëm, nuk duhet të injorohen, pasi një barrë e lartë e rrahjeve të parakohshme mund të jetë tregues i hershëm i sëmundjeve të zemrës./Gazeta Shneta/