Kolesteroli i njohur si HDL, prej dekadash konsideruar si “kolesteroli i mirë” për shkak të rolit të tij në mbrojtjen e zemrës, mund të mos jetë gjithmonë aq i dobishëm sa mendohej. Një studim i ri ka zbuluar se nivelet e larta të HDL mund të rrisin rrezikun për glaukomë – një sëmundje të syrit që mund të çojë në humbje të shikimit.
Studiuesit nga Universiteti Sun Yat-sen në Kinën Jugore ndoqën për 14 vjet gati 7,000 pjesëmarrës britanikë të moshës 40-69 vjeç. Rezultatet treguan se ata me nivele më të larta të HDL kishin një rrezik 10% më të lartë për të zhvilluar glaukomë krahasuar me ata me nivelet më të ulëta të këtij lloji kolesteroli shkruan Dailymail transmeton GazetaShneta.
Në të kundërt, personat me nivele më të larta të kolesterolit LDL, i njohur si “kolesteroli i keq”, kishin një rrezik 8% më të ulët për glaukomë. Megjithatë, ky rrezik i lidhur me HDL u vu re vetëm tek individët mbi 55 vjeç.
Studiuesit, të cilët publikuan gjetjet në revistën British Journal of Ophthalmology, theksuan se këto rezultate mund të çojnë në një rishikim të strategjive për menaxhimin e kolesterolit te pacientët në rrezik për glaukomë.
Glaukoma, e njohur ndryshe si “hajduti i heshtur i shikimit”, zakonisht zhvillohet ngadalë dhe pa simptoma në fazat e hershme. Ajo shkaktohet nga rritja e presionit në sy, i cili dëmton nervin optik. Në fazat më të avancuara mund të shfaqet me dhimbje të syve, mjegullim të shikimit dhe ndonjëherë edhe të përziera ose të vjella.
Studimi kishte disa kufizime, përfshirë përdorimin e vetëm një mostre gjaku për secilin pjesëmarrës, çka mund të mos reflektojë nivelet tipike të lipideve. Megjithatë, këto gjetje ngrenë pyetje mbi lidhjen komplekse mes kolesterolit dhe shëndetit të syve, duke nënvizuar nevojën për kërkime të mëtejshme./GazetaShneta/