Me ardhjen e pranverës dhe ndryshimeve në klimë, shumë njerëz në Kosovë përballen me alergji sezonale, të cilat shoqërohen me kruarje të syve, bllokim të hundës, rrjedhje të hundës, lodhje dhe teshtima të vazhdueshme, që shpesh bëhen pjesë e pandashme e jetës sonë.
Sipas Dr. Leonora Svarçës, alergoimunologe në QKUK, rinitet e shkaktuara nga polenet janë më të përhapura në Kosovë, shkruan Gazeta Shneta.
“Këto polene ne i quajmë në periudha polenike. I ndajmë në polenin e drurëve, polenin e barërave dhe ato të shkurreve. Shpesh ndodh që pacientët të jenë më të ndjeshëm ndaj më shumë se një poleni, dhe kur ato interferojnë me njëra-tjetrën, simptomat mund të zgjasin nga fillimi deri në fund të vitit”, tha ajo.
Dr. Svarça shprehet se në fillim simptomat mund të jenë të lehta, por shpesh mund të përkeqësohen dhe kërkojnë trajtim më të specializuar.
“Simptomat kryesore janë: rrjedhje e hundëve, kruarje e hundës, kruarje të veshëve, të qiellzës dhe ndonjëherë të fytit. Kur sëmundja përparon, pacientët kërkojnë ndihmë te mjekët specialistë dhe marrin trajtim dhe këshilla për mbrojtjen ndaj kësaj sëmundjeje”, thekson Dr. Svarça.
Tutje, alergoimunologia Dr. Svarca shprehet se fëmijët dhe adoleshentët janë më të rrezikuar nga alergjia.
“Alergjia nuk kursen asnjë moshë, por tek fëmijët dhe adoleshentët janë më të rrezikuar për shkak të ndjeshmërisë më të lartë të sistemit të tyre imunitar,” shtoi Dr. Svarça./Gazeta Shneta/
Për këto dhe detaje të tjera shihni videon më poshtë