Qendra Klinike Universitare e Kosovës ka ndërmarrë masa urgjente pas sulmeve të qenve endacakë brenda hapësirave të saj.
Ushtruesi i detyrës së drejtorit të QKUK-së, Mentor Zejnullahu, ka iniciuar formimin e një Shtabi Emergjent, me qëllim adresimin e situatës dhe garantimin e sigurisë për pacientët, stafin dhe vizitorët, përcjell Gazeta Shneta
Sipas njoftimit, ky shtab do të fokusohet në koordinimin ndërinstitucional dhe zbatimin e masave urgjente për identifikimin, kontrollin, largimin dhe parandalimin e rrezikut nga qentë endacakë brenda kampusit të QKUK-së.
Shtabi Emergjent përbëhet nga përfaqësues të strukturave të brendshme të QKUK-së, përfshirë drejtues institucionalë, përfaqësues nga Klinika Emergjente, Zyra Ligjore, si dhe Shërbimi i Sigurimit dhe zjarrfikësit.
Në këtë mekanizëm janë përfshirë edhe institucione të tjera relevante, si Komuna e Prishtinës, Agjencia e Ushqimit dhe Veterinarisë, Policia e Kosovës, Inspektorati komunal dhe kompani të kontraktuara për trajtimin e qenve endacakë, si dhe organizata të licencuara për mbrojtjen e kafshëve./Gazeta Shneta/