Një ekip studiuesish në Universitetin Penn State ka zhvilluar një sensor inovativ, i cili mund të diagnostikojë diabetin dhe para-diabetin brenda pak minutash, vetëm përmes një mostre të frymës.
Rezultatet e studimit u publikuan në Chemical Engineering Journal.
Aktualisht, një në pesë të rritur me diabet në SHBA nuk e di që e ka këtë gjendje, ndërsa diagnostikimi shpesh kërkon analiza laboratorike dhe vizita të kushtueshme.
Sensori i ri i udhëhequr nga profesori Huanyu “Larry” Cheng, funksionon duke zbuluar nivelet e acetonit në frymë – një nënprodukt i djegies së yndyrave.
Nivelet mbi 1.8 pjesë për milion tregojnë prani të diabetit, shkruan MedicalXpress transmeton Gazeta Shneta.
“Ndryshe nga metodat që kërkojnë gjak ose djersë, ky sensor ka nevojë vetëm për një frymëmarrje në një qese dhe pas disa minutash jep rezultatin,” shpjegon Cheng.
Për ta bërë këtë të mundur, ekipi përdori një material të quajtur grafen i induktuar nga lazeri, i kombinuar me oksid zinku, që rrit ndjeshmërinë dhe selektivitetin e sensorit ndaj acetonit, duke shmangur ndërhyrjen e molekulave të tjera si uji, që është i pranishëm në frymëmarrje.
Aktualisht, pajisja funksionon vetëm kur përdoret një qese për të shmangur faktorët mjedisorë, por studiuesit po punojnë që ajo të integrohet në maska ose të vendoset direkt nën hundë për përdorim më praktik.
Sipas Cheng, ky sensor jo vetëm që mund të thjeshtojë diagnostikimin e diabetit, por në të ardhmen mund të ndihmojë edhe në monitorimin e ndikimit të dietës dhe ushtrimeve fizike në shëndetin e individit./Gazeta Shneta/