Ushqimet ultra të përpunuara, si pijet e gazuara, ëmbëlsirat dhe fast food-i, janë të dizajnuara për të nxitur konsum të tepruar dhe varësi, njësoj si duhani, thuhet në një studim të ri shkencor.
Studimi është realizuar nga studiues të universiteteve Harvard, Duke dhe Michigan dhe është publikuar në revistën Milbank Quarterly.
Autorët kërkojnë që këto produkte t’i nënshtrohen rregullave të ngjashme me ato të duhanit, përfshirë taksa, kufizime reklamimi dhe etiketim paralajmërues, shkruan Euronews transmeton Gazeta Shneta.
Sipas studiuesve, ushqimet ultra të përpunuara nuk janë thjesht ushqime me pak vlera ushqyese, por produkte të inxhinieruara industrialisht për të rritur dëshirën, konsumimin e shpejtë dhe përdorimin e përsëritur.
“Disa ushqime ultra të përpunuara e kanë kaluar kufirin,” ka thënë Ashley Gearhardt, profesoreshë e psikologjisë në Universitetin e Michiganit dhe njëra nga autoret e studimit.
Ajo thekson se produkte si pijet e gazuara, ëmbëlsirat dhe ushqimi i shpejtë janë ndërtuar më shumë si cigaret sesa si ushqim i vërtetë, duke synuar krijimin e varësisë.
Organizata Botërore e Shëndetësisë paralajmëron se dietat e pasura me ushqime ultra të përpunuara lidhen me rritje të rrezikut për sëmundje të zemrës, kancer, diabet dhe obezitet.
Në këtë kategori përfshihen ushqimet e gatshme nga supermarketet, pica të ngrira, drithëra të ëmbëlsuara, biskota, salsiçe, akullore, nuggets pule dhe petë të çastit.
Studimi thekson se, ashtu si duhani, edhe këto produkte fillojnë nga lëndë natyrore, por më pas ripërpunohen për të rritur fitimin dhe konsumimin masiv, duke zhvendosur përgjegjësinë nga individi te industria.
Autorët propozojnë masa konkrete, përfshirë taksa për ushqimet ultra të përpunuara, ndalim të reklamimit për fëmijët dhe etiketa të qarta paralajmëruese, pasi pretendime si “low fat” apo “high protein” shpesh i paraqesin këto produkte si më të shëndetshme sesa janë në të vërtetë./Gazeta Shneta/