Presidenti i Shteteve të Bashkuara të Amerikës, Donald Trump, nënshkroi të hënën një urdhër ekzekutiv për të tërhequr Shtetet e Bashkuara nga Organizata Botërore e Shëndetësisë, e cila është një agjenci e Kombeve të Bashkuara që punon me entitete qeveritare dhe partnerë të tjerë për të përmirësuar shëndetin e njerëzve dhe komuniteteve në mbarë botën.
Deri më 19 janar, ajo kishte 124 shtete anëtare, përfshirë SHBA-në. Shtetet e Bashkuara iu bashkuan fillimisht OBSH-së në vitin 1948. Trump tërhoqi pjesëmarrjen e vendit gjatë mandatit të tij të parë, në vitin 2020, dhe ajo u rivendos nga ish-presidenti Joe Biden në vitin 2021 shkruan Abcnews trasnmeton GazetaShneta.
Në faqen zyrtare të OBSH-së, deri të hënën në mbrëmje thuhej: “Shtetet e Bashkuara të Amerikës luajnë një rol të rëndësishëm në mbështetjen e OBSH-së për të mbrojtur dhe përmirësuar shëndetin e amerikanëve dhe njerëzve në mbarë botën.”
Trump sugjeroi se kostoja e angazhimit ishte shumë e lartë për SHBA-në, duke thënë se vendi kishte paguar 500 milionë dollarë për të mbështetur organizatën, ndërsa Kina paguan vetëm 39 milionë. “Kina paguan 39 milionë, dhe ne paguajmë 500 milionë, ndërkohë që Kina është një vend më i madh,” tha ai, duke shtuar se kjo dukej “pak e padrejtë.” Duke lënë të kuptohet se mund të ketë hapësirë për negociata të mëtejshme, Trump tha: “Ata na donin mbrapsht me aq ngulm, ndaj do të shohim se çfarë do të ndodhë.”